संगमनेरमधील घरफोडीतील आरोपी अहिल्यानगर एलसीबीने मध्यप्रदेशात पकडला, सुमारे सहा लाखाचे दागिने हस्तगत

अहिल्यानगर – स्थानिक गुन्हे शाखेच्या (एलसीबी) पथकाने मध्यप्रदेशातून ताब्यात घेतलेल्या आरोपीने संगमनेर शहरात घरफोडी केल्याचे समोर आले आहे. या आरोपीच्या दुसऱ्या साथीदार फरार असून पोलिसांनी संबंधित आरोपींकडून सुमारे सहा लाख रुपयांचे दागिने हस्तगत करण्यात यश मिळविले.
गेल्या वर्षी (६ डिसेंबर) संगमनेर शहरातील मालपाणी नगरमध्ये राहत असलेल्या रुपेश मुरलीधर भालेराव (वय ४८, रा. मालपाणीनगर, सुदर्शन बंगला, संगमनेर) यांच्या बंगल्याच्या टेरेस वरील दरवाजाचा कडीकोयंडा तोडून अज्ञात चोरट्यांनी बंगल्यात प्रवेश मिळवत ३ लाख ७ हजार रूपये किंमतीचे सोन्याचे दागीने चोरून नेले होते. याबाबत संगमनेर शहर पोलीस स्टेशनला अज्ञात आरोपी विरुद्ध गु.र.नं. १०१३/२०२४ बीएनएस कलम ३०५ (अ), ३३१ (४) प्रमाणे घरफोडीचा गुन्हा दाखल केला होता.
या संदर्भात पोलीस अधीक्षक राकेश ओला यांनी अहिल्यानगरच्या स्थानिक गुन्हे शाखेला तपास करण्याचे आदेश दिले होते. एलसीबीचे पोलीस निरीक्षक दिनेश आहेर यांनी सहाय्यक पोलीस निरीक्षक हेमंत थोरात, पोलीस अंमलदार संदीप पवार, फुरकान शेख, बाळासाहेब नागरगोजे, किशोर शिरसाठ, अमृत आढाव, प्रशांत राठोड व अरूण मोरे यांना गुन्ह्यातील आरोपींची माहिती व शोध घेण्यासाठी या अधिकारी, कर्मचाऱ्यांचे पथक नेमले होते.
या पथकाने संगमनेरच्या मालपाणी नगर मधील गुन्ह्याच्या ठिकाणी भेट देवुन आसपासचे सीसीटीव्ही फुटेज व तांत्रीक विश्लेषणाचे आधारे सदरचा गुन्हा हा विकास सरदारसिंग मिना याने त्याच्या साथीदारासह केल्याचे तपासात निष्पन्न केले. आरोपीच्या शोधासाठी पथकाने मध्यप्रदेश येथे जात आरोपी राहत असलेल्या ठिकाणावर शोध घेतला असता तेथे पथकाला संशयित आरोपी आढळून आला.
पथकाने केलेल्या चौकशीत या संशयित आरोपीचे नाव विकास उर्फ बंटी सरदारसिंग मिना असे असल्याचे स्पष्ट झाले. त्यामुळे पथकाने त्याला ताब्यात घेत त्याच्याकडे संगमनेरमधील घरपोडी संदर्भात चौकशी केली असता त्याने गुन्ह्याची कबुली देत सदरचा गुन्हा हा आदित्य कंजर (रा. रूलकी, ता. जि. शाजापूर, राज्य मध्यप्रदेश) (फरार) याचेसह केल्याचे सांगीतले.
पथकातील अधिकारी, कर्मचाऱ्यांनी पकडलेल्या आरोपीकडे मुद्देमालाबाबत विचारपूस केली असता त्याने गुन्हयातील चोरी केलेले काही दागीने हे त्याचा मित्र निरज मनोज छावडी यास स्वतःचे पत्नीसे दागीने असल्याचे सांगुन दिले व उर्वरीत दागीने हे आदित्य कंजर याचेकडे असल्याचे सांगितले. आरोपीने दिलेल्या माहितीवरून निरज मनोज छावडी याचे राहते घरी जाऊन पथकाने खात्री केला असता तो बाहेरगावी असल्याची माहिती समोर आली.
शनिवारी पथकातील अधिकाऱ्यांनी निरज मनोज छावडी (वय ३०, रा. रूलकी, ता. जि. शाजापूर, राज्य मध्यप्रदेश) याच्याकडे केलेल्या चौकशीत त्याने पोलिसांनी पकडलेला आरोपी विकास उर्फ बंटी सरदारसिंग मिना हा मित्र असून त्याने डिसेंबर २०२४ मध्ये त्याचे पत्नीचे दागीने असल्याचे सांगुन १०-१५ दिवस ठेवण्यासाठी दिले असल्याची माहिती दिली. तसेच तपासात ५ लाख ८५ हजार रूपये किंमतीचे ७५ ग्रॅम वजनाचे सोन्याचे दागीने त्यात गंठण, नेकलेस, चैन व कर्णफुले असे सोन्याचे दागीने जप्त करण्यात आले आहेत. आरोपी विकास उर्फ बंटी सरदारसिंग मिना याला जप्त करण्यात आलेल्या मुद्देमालासह पुढील चौकशीसाठी संगमनेर शहर पोलिसांच्या ताब्यात देण्यात आले आहे. संगमनेर शहर पोलीस याप्रकरणी पुढील तपास करत आहे.