बँक खाते आधार संलग्न करा… नाहीतर संजय गांधी निराधार योजना आणि श्रावण बाळ राज्य निवृत्ती वेतन योजनेचा लाभ होईल बंद

अहिल्यानगर दि. २७-

संजय गांधी निराधार योजना व श्रावणबाळ राज्य निवृत्ती वेतन योजना या योजनांचा लाभ घेणाऱ्या लाभार्थ्यांनी आपले बँक खाते आधार कार्ड सोबत संलग्न करून घ्यावे लागणार आहे अन्यथा या योजनेचा लाभ फेब्रुवारी महिन्यापासून बंद होणार असल्याचे सांगण्यात आले आहे.

संजय गांधी निराधार योजना व श्रावणबाळ राज्य निवृत्ती वेतन योजनेच्या लाभार्थ्यांना अर्थसहाय्याचे वितरण फेब्रुवारी २०२५ पासून डीबीटीद्वारे वितरित करण्यात येणार आहे. यासाठी लाभार्थ्यांनी त्यांचे बँक खाते आधारकार्डशी संलग्न करुन घेण्याचे आवाहन उपजिल्हाधिकारी (महसूल) अतुल चोरमारे यांनी केले आहे.

लाभार्थ्यांनी योजनेच्या लाभासाठी उघडलेले बँक खाते आधार क्रमांक व मोबाईल क्रमांकासोबत जोडण्यासाठी बँक खाते, आधार व मोबाईल क्रमांक आदी माहिती संबंधित तहसील कार्यालयात तातडीने जमा करण्याचे आवाहन करण्यात आले आहे.

ज्या लाभार्थ्यांचे बँक खाते आधार क्रमांक व मोबाईल क्रमांकांशी संलग्न नाहीत, अशा लाभार्थ्यांना योजनेंतर्गत प्राप्त होणारा लाभ फेब्रुवारी, २०२५ पासून बंद होणार असल्याचेही कळविण्यात आले आहे.