मंगळवार, दि. ११ फेब्रुवारी
सिने अभिनेते राहुल सोलापूरकर यांनी छत्रपती शिवाजी महाराज यांच्यावर केलेल्या वादग्रस्त विधानानंतर डॉ. बाबासाहेब आंबेडकर यांच्या बद्दल वादग्रस्त वक्तव्य केले. त्यामुळे सोलापूरकरांविरोधात राज्यभरातून तीव्र प्रतिक्रिया येण्यास सुरुवात झाली आहे. मंगळवारी सकाळी वंचित बहुजन आघाडी आणि आरपीआयने सोलापूरकर यांच्या घरासमोर आंदोलन केले.
छत्रपती शिवाजी महाराज यांच्या बद्दल अभिनेते राहुल सोलापूरकर यांनी वादग्रस्त विधान केल्याचा व्हिडिओ समोर आला होता. त्यानंतर सोलापूरकर यांच्या कोथरूड येथील घराबाहेर ठाकरे गटाकडून आंदोलन करण्यात आले होते.
सोलापूरकर यांच्या घराबाहेर आंदोलनाच्या पार्श्वभूमीवर चोख पोलीस बंदोबस्त वाढविण्यात आला होता. मात्र शिवाजी महाराजांबद्दल आक्षपार्ह वक्तव्य प्रकरण कुठे थांबत नाही तोच आता पुन्हा सोलापूरकर यांनी डॉ. बाबासाहेब आंबेडकरांबद्दल केलेल्या वादग्रस्त विधानाबद्दल त्यांच्यावर ॲट्रॉसिटीचा गुन्हा दाखल करून त्यांना अटक करण्यात यावी, या मागणीसाठी वंचित बहुजन आघाडी आणि आरपीआयने आंदोलन केले आहे.
महापुरुषांबद्दल सातत्याने गरळ रोखणाऱ्या सिने अभिनेता राहुल सोलापूरकरबद्दल राज्यातील जनतेत संतापाचे वातावरण निर्माण झाले आहे. सोलापूरकर यांच्या विरोधात राज्यभरातून तीव्र प्रतिक्रिया येत असून वादग्रस्त वक्तव्य करून प्रसिद्धीच्या झोतात राहण्याचा प्रयत्न करणाऱ्या सोलापूरकर यांच्या विरोधात आता लोक रस्त्यावर उतरू लागले आहे. 
