मंगळवार, दि. ११ फेब्रुवारी –
तत्कालीन महसूलमंत्र्यांचे सातत्याने फसलेले वाळू धोरण महसूल विभागाच्या जीवावर बेतले आहे. गेल्या काही वर्षातील एकही महसूल मंत्री अथवा महसूल प्रशासन या वाळू तस्करांचा माज उतरवू शकलेले नाही.
राजकीय पक्ष नेत्यांच्या वरदहस्ताने संगमनेर तालुक्यातील सर्व नद्यांचे वाळूच्या रुपाने लचके तोडण्याचे काम तस्करांकडून सुरू आहे. अशाच एका अवैध वाळू उपशावर महसूल विभागाची रविवारी मध्यरात्री वक्रदृष्टी पडली होती. महसूल विभागाच्या रात्र गस्तीवर असलेल्या पथकाने संगमनेर तालुक्यातील कनोली येथे प्रवरा नदीपात्रातून सुरू असलेल्या वाळू तस्करीवर कारवाईचा प्रयत्न केला.
मात्र संतापलेल्या वाळूतस्करांनी थेट या पथकाच्या अंगावरच जेसीबी घालण्याचा प्रयत्न केला, प्रसंगावधान राखत पथकातील अधिकारी कर्मचारी बाजूला झाल्याने मोठा अनर्थ टळला असला तरी तस्करांकडून हल्ल्याचे संकट मात्र कायम आहे. कामगार तलाठी संतोष बाबासाहेब शेलार हे पथकासह नदीपात्रात सुरू असलेल्या अवैध वाळू उपसा करणाऱ्यांवर कारवाईसाठी गेले होते.
कनोली येथे थेट जेसीबीच्या सहाय्याने सुरू असलेल्या अवैध वाळू उपशावर कारवाईचा बडगा उगारताच जेसीबी चालक त्याच्या ताब्यातील जेसीबी घेऊन पळून जाऊ लागला.
पथकाने त्याचा पाठलाग केला असता सावळीराम लहानु खेमनर, तुषार हौशीराम खेमनर, विशाल हौशीराम खेमनर, सागर जगताप, लखन उर्फ दीपक मदने आणि अन्य दोघा ठिकाणी दुचाकी आणि कार जेसीबीच्या मागे पुढे ठेवून पथकाला कारवाईस अडथळा आणला.
पथकाने पुढे जात अंभोरे गावच्या पुढे जेसीबी थांबविला असता वरील आरोपींसह विशाल आबाजी खेमनर, प्रवीण शिवाजी गवारी, फिरोज शेख व ताहीर शेख यांनी आणखी काही जणांना जमा करत सरकारी कामात अडथळा आणत आमच्यावर जर कारवाई केली तर तुमच्या हात पाय तोडू व याचे जिवंत मारून टाकू असे धमकी दिली. यावेळी जेसीबी चालक सोनू मोरे याने पथकातील कर्मचाऱ्यांना जीवे मारण्याच्या उद्देशाने त्यांच्या अंगावर जेसीबी घातला मात्र प्रसंगावधान राखल्याने पथकातील कर्मचारी वाचले.
यासंदर्भात कामगार तलाठी संतोष शेलार यांनी दिलेल्या फिर्यादीवरून संगमनेर तालुका पोलीस ठाण्यात वरील आरोपीं विरोधात गुन्हा दाखल करण्यात आला आहे. पोलीस पुढील तपास करत आहेत.
कठोर कारवाई करणार…
संगमनेर शहर व तालुक्यात सुरू असलेल्या अवैध वाळू वाहतूक करणाऱ्यांवर कारवाईसाठी महसूल विभागाने भरारी पथके नेमली आहे. या पथकांच्या माध्यमातून अवैध वाळू तस्करांवर कठोरात कठोर कारवाई करून गुन्हे दाखल केले जाणार आहेत. – धीरज मांजरे तहसीलदार, संगमनेर.
