अहिल्यानगर, दि. १७ –
जिल्हा नियोजन समितीने डॉ. झाकिर हुसेन मदरसा आधुनिकीकरण योजना २०२४-२५ अंतर्गत मदरशांमध्ये मूलभूत आणि आधुनिक सुविधा पुरवण्यासाठी प्रस्ताव मागविले आहेत.
इच्छुक मदरशांनी २२ फेब्रुवारी २०२५ पर्यंत प्रस्ताव सादर करावेत, असे आवाहन जिल्हा नियोजन अधिकारी तथा डॉ. झाकिर हुसैन मदरसा आधुनिकीकरण योजनेचे सदस्य सचिव दीपक दातीर यांनी केले आहे.
मदरसा आधुनिकीकरण योजनेचा लाभ राज्यातील धर्मादाय आयुक्त अथवा वक्फ बोर्डाकडे नोंदणीकृत असलेल्या मदरशांना मिळेल. एसपीक्यूईएम या केंद्र पुरस्कृत योजनेंतर्गत लाभ मिळणाऱ्या मदरशांना ही योजना लागू राहणार नाही.
मदरशांमध्ये विज्ञान, गणित, समाजशास्त्र, हिंदी, मराठी व इंग्रजी इत्यादी विषयांचा अभ्यासक्रम राज्यशासनाच्या अन्य शाळांप्रमाणे राहील. तसेच, शिक्षकांचे प्रतिदिन ५ तासिका याप्रमाणे कामाचे तास निश्चित करण्यात येतील.
या निधीतून मदरशांच्या इमारतींचे नूतनीकरण, पिण्याच्या पाण्याची सुविधा, स्वच्छतागृहांची व्यवस्था, विद्यार्थ्यांसाठी आवश्यक फर्निचर, मदरसा निवासस्थानात इन्व्हर्टर, मदरसांच्या निवासी इमारतीचे नूतनीकरण व डागडुजी, संगणक कक्ष व प्रयोगशाळा व इतर अध्ययन साहित्य या पायाभूत सुविधांसाठी मदत दिली जाणार आहे.
शासन निर्णय आणि अर्जाचा नमुना http://mdd.maharashtra.gov.in या संकेतस्थळावर उपलब्ध आहे. मदरशांनी परिपूर्ण प्रस्ताव जिल्हा नियोजन समिती, जिल्हाधिकारी कार्यालय, अहिल्यानगर येथे मुदतीत सादर करण्याचे आवाहन करण्यात आले आहे.
