शनिवार दि. २१ फेब्रुवारी
सिंधुदुर्ग (सावंतवाडी) – सिंधुदुर्ग जिल्ह्यातील तारकर्ली येथे पर्यटनासाठी आलेले पुण्याचे पाच पर्यटक तारकर्ली समुद्रात बुडाले असून यापैकी दोघांचा मृत्यू झाला आहे. तर एक जण गंभीर असून दोघेजण बचावले असल्याची माहिती समोर येत आहे.
पुण्याच्या हडपसर मधून पर्यटनासाठी गेलेल्या पर्यटकांचा समुद्रात बुडून दुर्दैवी मृत्यू झाल्याने पुण्यात दुःखद वातावरण निर्माण झाले आहे. शनिवारी सकाळी साडेअकरा वाजता तारकर्ली पर्यटन केंद्रानजीकच्या समुद्रात ही दुर्घटना घडली.
रोहित बाळासाहेब कोळी (२१) व शुभम सुनील सोनवणे (२२) दोन्ही रा. हडपसर, हवेली पुणे अशी या दुर्घटनेतील दोघा मृतांची नावे आहेत. तर दुर्घटनेतील तिसरा ओंकार भोसले या युवकावर रुग्णालयात उपचार सुरू आहेत.
कुश संतोष गदरे (२१), रोहन रामदास डोंबाळे (२०), ओंकार अशोक भोसले (२४) उपचार, रोहित बाळासाहेब कोळी (२१) शुभम सुनील सोनवणे (२२) हे पाच युवक मालवण तारकर्ली येथे पर्यटनासाठी गेले होते.
शनिवारी सकाळी हे सर्वजण तारकर्ली पर्यटन विकास महामंडळानजीक असलेल्या समुद्रकिनारी गेले असता ते समुद्रात स्नानासाठी उतरले होते. समुद्रातील पाण्याच्या खोलीचा व लाटांचा अंदाज न आल्याने त्यांच्यातील ओंकार भोसले, रोहित कोळी, शुभम सोनवणे हे तिघेजण समुद्राच्या पाण्यात ओढले गेले. ही बाब लक्षात येताच किनाऱ्यावरील स्थानिकांनी तसेच पर्यटकांनी तात्काळ समुद्राच्या पाण्यात बचाव कार्य सुरू केले.
पाण्यात केलेल्या शोध कार्यानंतर बुडालेले तिघेजण सापडले. त्यांना तात्काळ रुग्णालयात दाखल केल्यानंतर त्यातून दोघांचा मृत्यू झाला होता. तपासणी केली असता रोहित कोळी व शुभम सोनावणे यांना मयत घोषित केले. मात्र ओंकार भोसले हा गंभीर असल्याने त्याच्यावर उपचार सुरू आहेत.
