संगमनेर –
संगमनेर तालुक्यात घरकुल वाटपात येथून मागे राजकारण झाले होते. परंतु येथून पुढे घरकुल वाटपाचे काम अत्यंत पारदशींपणे केले जाईल. ज्याला खऱ्या अर्थाने घरकुलाची गरज आहे. अशा गरजू लाभार्थ्यांना घरकुलाचा लाभ दिला जाईल, असे प्रतिपादन आमदार अमोल खताळ यांनी केले.
तालुक्यातील ७,१४५ घरकुल लाभार्थ्यांच्या बँक खात्यावर पहिला हप्ता ऑनलाइन जमा करण्यात आले असल्याचे प्रमाणपत्र लाभार्थ्यांना आमदार खताळ यांच्या हस्ते पंचायत समिती सभागृहात देण्यात आले. यावेळी संगमनेर पंचायत समितीचे सहाय्यक गटविकास अधिकारी राजेंद्र ठाकूर, तालुका आरोग्य अधिकारी डॉ. सुरेश घोलप, रोहिदास गुंजाळ, सार्वजनिक बांधकाम उप विभागाचे उपअभियंता गणेश गुंजाळ, लघुपाटबंधारे विभागाचे उपअभियंता हितेंद्र गव्हाळे, कृषी अधिकारी वाळीबा उघडे व रामराव कडलग, विस्तार अधिकारी मदन शेवाळे, राजेंद्र कासार, काशिनाथ सरोदे, सदानंद डोखे, भाग्यश्री शेळके आदी उपस्थित होते.
खताळ म्हणाले, या देशातील सर्वांना हक्काचे घर मिळाले पाहिजे अशी संकल्पना पंतप्रधान नरेंद्र मोदी यांची आहे. यापूर्वीच्या काळात येथून मागे मंजूर झालेल्या घरकुलांचे कामे पूर्ण करण्यात अनेक अडचणी आल्या होत्या. परंतु आता पुढील काळात घरकुलांसंदर्भात अडचणी येणार नाही, याची काळजी घेतली जाईल. घरकुलाचे बांधकाम करताना वाळू मिळण्यास अनेक अडचणी आल्या होत्या. मुख्यमंत्री देवेंद्र फडणवीस यांनी घरकुलाच्या बांधकामासाठी वाळू मोफत देण्याचे धोरण जाहीर केले आहे, त्यामुळे घरकुलांना मोफत वाळू उपलब्ध करून द्यावी अशी सूचना आपण प्रांतांधिकारी आणि तहसीलदार देत असल्याचे ते म्हणाले.
प्रास्ताविक व स्वागत राजेंद्र ठाकूर यांनी केले. सूत्रसंचालन कक्ष अधिकारी राजेश तिटमे यांनी करून उपस्थितांचे आभार मानले
संगमनेर पंचायत समितीच्या सभागृहामध्ये एकाच वेळी पुणे येथून केंद्रीय गृह तथा सहकार मंत्री अमित शहा, मुख्यमंत्री देवेंद्र फडणवीस, उपमुख्यमंत्री एकनाथ शिंदे, अजित पवार व ग्रामविकास मंत्री जयकुमार गोरे यांच्या प्रमुख उपस्थितीत घरकुल लाभार्थ्यांच्या बँक खात्यावर पहिल्या टप्प्याचे अनुदान वर्ग करण्यात आले. लाभार्थ्यांना केंद्रीयमंत्री अमित शहा, मुख्यमंत्री देवेंद्र फडणवीस, उपमुख्यमंत्री एकनाथ शिंदे आणि अजित पवार यांनी मार्गदर्शन केले.
