पुणे, दि. २८ फेब्रुवारी
२६ वर्षीय तरुणीवर स्वारगेट बस स्थानकामध्ये उभ्या असलेल्या शिवशाही बस मध्ये अत्याचार करणाऱ्या आरोपीला मध्यरात्री दीड वाजण्याच्या सुमारास पकडण्यात पुणे पोलिसांना यश आले आहे. पुणे पोलिसांनी बलात्कार प्रकरणातील आरोपी दत्ता गाडेला त्याच्या गावातून अटक केल्याची माहिती पोलीस उपायुक्त स्मार्तना पाटील यांनी दिली.
स्वारगेट बस स्थानकात एका २६ वर्षीय तरुणीवर बसमध्येच बलात्कार झाल्याची धक्कादायक घटना घडली. या घटनेने संपूर्ण महाराष्ट्र हादरला होता. या प्रकरणी आरोपी दत्ता गाडे हा दोन दिवसांपासून फरार होता. फरार असलेल्या आरोपीला शोधण्यासाठी पोलिसांनी आरोपीवर १ लाख रुपयांचं बक्षीस जाहीर केलं होतं. बड्या राजकीय नेत्याच पोरग तीन तासात सापडतं आणि अत्याचार करणारा नराधम आरोपी पोलिसांना सापडत नाही, यावरून स्वारगेट बस स्थानकातील घटनेवरून सरकारवर जोरदार टीका होत होती. हे पोलिसांचं अपयश असल्याचा आरोप करण्यात येत होता.
या प्रकरणातील आरोपी दत्तात्रय रामदास गाडे (वय ३५ रा. शिक्रापूर) याला त्याच्या गावातून अटक करण्यात आली आहे. त्याच्या शोधासाठी पुणे पोलिसांनी विविध पथकं रवाना केली. तब्बल १८ पथक विविध ठिकाणी त्याचा शोध घेत होती. १०० पोलिस, श्वान पथक आणि ड्रोन कॅमेराची नजर, तरीही नराधम दत्ता गाडे पोलिसांना सापडत नव्हता.
आरोपी दत्ता गाडे हा पुणे जिल्ह्यातील शिरुरमधील रहिवासी असून तो गावातील एका उसाच्या शेतात लपलेला असल्याची माहिती पोलिसांना मिळाली. पोलिसांनी शेतात सर्च ऑपरेशन सुरू केलं. ड्रोनच्याद्वारे पोलीस आरोपीचा शोध घेत होते. अखेर मध्यरात्री त्याला पोलिसांकडून अटक करण्यात आली आहे.
मध्यरात्री एक ते दीड वाजण्याच्या सुमारास दत्ता गाडे हा एका कॅनॉलमध्ये झोपलेला आढळून आला. त्यामुळे त्याला पोलिसांच्या पथकांनी चारीबाजुंनी वेढा घातला. यावेळी नराधम दत्ता गाडे याला ड्रोनमधून पोलिसांनी उद्घोषणा करुन तुला वेढल्याचं सांगितलं. त्यामुळे नराधम दत्ता गाडेची पाचावर धारण बसली. पोलिसांनी वेळ न दवडता या नराधमाच्या मुसक्या आवळल्या, अशी माहिती पोलीस सूत्रांनी दिली. दरम्यान या संदर्भात आरोपीला दुपारी न्यायालयात नेले जाणार असून पोलीस पत्रकार परिषद घेऊन सर्व माहिती देणार आहे.
