संगमनेर, दि. २८ फेब्रुवारी
एसटी बसमधून प्रवास करणाऱ्या महिलेच्या सीटवर गळ्यातील मंगळसूत्रामधील मनी पडले असता महिलेला आपल्या गळ्यातील दोन तोळे वजनाचे सोन्याचे मंगळसूत्र गायब झाल्याचे लक्षात आले. गुरुवारी (२७ फेब्रुवारी) संगमनेर बस स्थानकावर हा प्रकार घडला.
संगमनेर बस स्थानकामधून महिलांच्या गळ्यातील दागिने वारंवार चोरी जात आहे. दागिने चोरट्यांचा शोध लागत नसल्याने चोरट्यांचे मनोधैर्य वाढले असून दिवसाढवळ्या ते महिलांच्या गळ्यातील दागिन्यांच्या चोऱ्या करत आहे. दागिने चोरट्यांसाठी संगमनेर बस स्थानक आणि बसस्थानकावरील गर्दी फायद्याची ठरत आहे. बस स्थानकावर असलेल्या एखाद-दोन पोलिसांचा डोळा चुकवून बस स्थानकावरील सुरक्षारक्षकांच्या उपस्थितीतही चोऱ्या होऊ लागल्याने संगमनेरचे बस स्थानक महिलांसाठी असुरक्षित बनू लागले आहे.
संगमनेर तालुक्यातील पेमगिरी येथील एक महिला महाशिवरात्री निमित्ताने बुधवारी अकोले येथे आपल्या नातेवाईकांकडे गेली होती. गुरुवारी ती गावी जाण्यासाठी दुपारी दीड वाजण्याच्या सुमारास अकोल्याहून संगमनेरला परतली होती. संगमनेर बस स्थानकावर बसची वाट पाहत असताना साडेतीन वाजण्याच्या सुमारास पेमगिरीला जाण्यासाठी फलाटावर बस लागली होती.
बसमध्ये चढण्यासाठी शालेय, महाविद्यालयीन विद्यार्थी आणि लोकांची गर्दी होती. गर्दीत महिला कशीबशी बसमध्ये चढली आणि सीटवर बसल्यानंतर गळ्यातील मनी मंगळसूत्रामधील काही मनी सीटवर पडल्याचे महिलेच्या लक्षात आले. त्यामुळे महिलेने आपल्या गळ्यातील मंगळसूत्र बघितले असता गळ्यात मंगळसूत्र नव्हते. अज्ञात कोणीतरी गळ्यातील मंगळसूत्र तोडून चोरून नेल्याचे महिलेच्या लक्षात आले.
त्यामुळे संध्याकाळी नऊ वाजण्याच्या सुमारास महिलेने संगमनेर शहर पोलीस स्टेशन गाठत याबाबत माहिती दिली. महिलेच्या तक्रारीवरून अज्ञात चोरट्याविरुद्ध गळ्यातील दोन तोळे वजनाचे मंगळसूत्र चोरून नेल्याचा गुन्हा रजिस्टर नंबर १४५/२५ भारतीय न्याय संहिता कलम ३०३(२) नुसार गुन्हा दाखल करण्यात आला असून पुढील तपास महिला पोलीस कर्मचारी सविता वायकर करत आहे.
