संगमनेर, दि. ५ मार्च – प्रतिनिधी
सहकारातील दिशादर्शक आणि आदर्श ठरलेल्या तसेच संगमनेर तालुक्याच्या विकासात महत्त्वपूर्ण योगदान देणाऱ्या सहकार महर्षी भाऊसाहेब थोरात सहकारी साखर कारखान्याच्या विस्तारित डिस्टिलरी व इथेनॉल प्रकल्पाचा शुभारंभ, कारखान्यात उत्पादित झालेल्या ८ लाख ७७७ साखर पोत्यांचे पूजन माजी मंत्री, काँग्रेसचे ज्येष्ठ नेते बाळासाहेब थोरात यांच्या हस्ते रविवारी (९ मार्च) होणार असल्याची माहिती कारखान्याचे अध्यक्ष बाबा ओहोळ यांनी दिली.
माजी मंत्री बाळासाहेब थोरात यांच्या नेतृत्वाखाली कार्यरत असलेल्या सहकार महर्षी भाऊसाहेब थोरात सहकारी साखर कारखान्याने उभारलेल्या साडेपाच हजार मेट्रिक टन क्षमतेचा कारखान्यातून गेल्या तीन वर्षापासून दहा लाख मेट्रिक टना पेक्षा अधिक ऊस गाळप झाले आहे. यावर्षी देखील मोठ्या प्रमाणात गाळप होणार आहे. तालुक्याच्या विकासात योगदान देणाऱ्या थोरात कारखान्याला देश पातळीवरील सर्वोत्कृष्ट सहकारी साखर कारखाना म्हणून दोनदा गौरविण्यात आले आहे.
तांत्रिक कार्यक्षमता आणि उत्पादनाबाबत १६ राष्ट्रीय पुरस्काराने कारखान्याचा सन्मान झाला आहे. याशिवाय तब्बल ११ वेळा राज्यस्तरीय, महाराष्ट्र शासनाचा सहकार भूषण पुरस्कार, राष्ट्रीय उद्योजकता पुरस्कार आणि कार्यकारी संचालक व व्यवस्थापनासाठी दोन वेळा सन्मान झाला आहे.
कारखान्याने आता विस्तारित डिस्टिलरी व इथेनॉल प्रकल्पाच्या बरोबरच यावर्षीच्या गळीत हंगामात उत्पादित झालेल्या ८ लाख ७७७ साखर व त्याचे पूजन माजी मंत्री थोरात, पत्नी कांचनताई यांच्या हस्ते व जयहिंद लोक चळवळीचे संस्थापक माजी आमदार डॉ. सुधीर तांबे यांच्या अध्यक्षतेखाली रविवारी आयोजित केले आहे. नाशिक पदवीधर मतदार संघाचे आमदार सत्यजित तांबे यांच्यासह जिल्ह्यातील विविध मान्यवर यावेळी उपस्थित राहणार आहेत.
इथेनॉल निर्मितीमुळे राष्ट्रीय कार्यास हातभार… माजी मंत्री बाळासाहेब थोरात यांच्या नेतृत्वाखाली विस्तारित डिस्टिलरी व इथेनॉल प्रकल्पातून दररोज ८० हजार लिटर इथेनॉल निर्मिती होणार आहे. यामुळे राष्ट्रीय कार्यास हातभार लागणार असून या प्रकल्पातून बाहेर पडणारे सांडपाणी वाफेद्वारे घट्ट केले जाईल. आधुनिक इन्सिनरेशन बॉयलर मध्ये ते जाळले जाऊन त्यातून पोटॅशियम उत्तराख निर्मिती होणार असून ही राख अमृत शक्ती दाणेदार खतांमध्ये वापरली जाऊन अधिक गुणवत्तापूर्ण खत निर्मिती केली जाणार आहे. – जगन्नाथ घुगरकर, कार्यकारी संचालक, थोरात कारखाना.
