अहिल्यानगर, दि. ७ मार्च – महाराष्ट्र संवाद न्यूज
महसूलच्या पथकाने पकडलेले वाळू वाहतुकीचे दोन वाहने सोडवून देण्यासाठी दोन लाखाची लाच मागणाऱ्या पैठणच्या तहसीलदारासह महसूल सहाय्यक आणि एका खासगी व्यक्तीवर अहिल्यानगरच्या लाच लुचपत पथकाने कारवाई केली आहे. या तिघा लाचखोराविरुद्ध पोलीस ठाण्यात गुन्हा दाखल करण्यात आला आहे.
खाजगी इसम सलील करीम शेख (वय- ३८ वर्षे, व्यवसाय शेती, रा. लक्ष्मीनगर, ता. पैठण, जि. छत्रपती संभाजीनगर), हरिष शिंदे (महसूल सहाय्यक, वर्ग ३, तहसिल कार्यालय पैठण, जि. छत्रपती संभाजीनगर) आणि तहसीलदार सारंग भिकूसिंग चव्हाण, वय ४८ वर्ष, रा. ए विंग, फ्लॅट नंबर ३०५, द प्राईड इग्निमा, सुतगिरणी चौक, गारखेडा परिसर छत्रपती संभाजीनगर) अशी तिघा आरोपींची नावे आहे.
अहिल्यानगरच्या लाच लुचपत प्रतिबंधक विभागाकडे तक्रार करणाऱ्या तक्रारदाराचा माती व वाळू वाहतुकीचा व्यवसाय आहे. त्याची वाळू वाहतुकीची दोन वाहने महसूल विभागाच्या पथकाने पकडली होती व दोन्ही वाहने पैठणच्या तहसील कार्यालयात जमा केली होती.
तहसिल कार्यालयातील काम करणारे खाजगी इसम सलील शेख यांनी तक्रारदाराची जप्त असलेली वाळू वाहतुकीची पकडलेली दोन्ही वाहने सोडून देण्याकरिता स्वतःसाठी व तहसिलदार चव्हाण यांच्याकरिता दोन लाख रुपयांची लाचेची मागणी केली होती. त्यावेळी वाहने सोडण्याच्या प्रस्तावावर तहसिलदार चव्हाण पैसे दिले शिवाय सही करणार नाही म्हणून नाईलाजास्तव तक्रारदार यांनी खाजगी इसम सलील शेख यांना फोन पे द्वारे ४०,०००/- रुपये व ५०,०००/- रुपये रोख स्वरूपात दिले होते.
तसेच महसूल सहाय्यक शिंदे यांनी तक्रारदाराकडे दंडाच्या रकमेचे चलन काढून देण्याकरिता ५०,०००/- रुपये लाचेची मागणी केली होती. त्यामुळे तक्रारदाराने त्यावेळी नाईलाजास्तव शिंदे यांना वीस हजार रुपये दिले होते.
प्राप्त लाच मागणी तक्रारीच्या अनुषंगाने १८ फेब्रुवारीला लाच लुचपत विभागाने पंचासमक्ष लाच मागणी पडताळणी केली असता खाजगी इसम सलील शेख यांनी तक्रारदार यांची जप्त असलेली वाळू वाहतुकीची दोन वाहने सोडण्याकरता स्वतःसह, तहसिलदार चव्हाण यांच्यासाठी १,१०,०००/- रुपयांची लाच मागणी केली व स्वीकारण्याचे मान्य केले. तसेच महसूल सहाय्यक शिंदे यांनी तक्रारदार यांचे जप्त केलेल्या वाहनातील वाळू त्यांचे घरी टाकण्याचे सांगितल्याने त्यांनी तक्रारदार यांच्याकडे वस्तूच्या स्वरूपात लाचेची मागणी केली.
२४ जानेवारीला तक्रारदाराकडे तीस हजार रुपयांची मागणी केली. त्यामुळे सोमवारी लाच लुचपत प्रतिबंधक विभागाच्या अधिकाऱ्यांनी सापळा लावला असता खाजगी इसम सलील शेख याने तक्रारदार यांचेकडून पंचासमक्ष लाचेची १,१०,००० रुपयांची रक्कम स्वीकारली. लाचेची रक्कम स्वीकारल्यानंतर सलील शेख याच्या वाहनाची तपासणी केली असता सदर वाहनात तहसिल कार्यालयातील तहसिलदार यांच्या सह्या असलेल्या महत्त्वाच्या कागदपत्रांच्या फाईल मिळून आल्या.
सलील शेख याचे मोबाईलमधील व्हाट्सअप अधिकाऱ्यांनी चेक केले असता त्यामध्ये सलील याने कार्यालयीन पत्र व्यवहार तहसिलदार यांचे व्हाट्सअपवर पाठवून तो बरोबर आहे का ते चेक करण्यास सांगितले असता त्यांनी बरोबर असल्याचे सांगितले आहे. यावरून तहसिलदार चव्हाण यांनी खाजगी इसम सलील शेख यास तहसिल कार्यालयातील सुविधा पुरवून तक्रारदार यांच्याकडे लाचेची मागणी करण्यास व स्वीकारण्यास अपप्रेरणा व प्रोत्साहन दिले आहे. त्यामुळे तिन्ही आरोपींविरुद्ध पैठण पोलीस ठाण्यात गुन्हा दाखल करण्यात आला आहे.
पोलीस उपअधीक्षक अजित त्रिपुटे यांच्या नेतृत्वाखाली पोलीस निरीक्षक राजू आल्हाट, पोलीस हेड कॉन्स्टेबल संतोष शिंदे, पोलीस अंमलदार रविंद्र निमसे, बाबासाहेब कराड, चंद्रकांत काळे, गजानन गायकवाड, हारून शेख, दशरथ लाड यांच्या पथकाने ही कारवाई केली.
