संगमनेर दि. ११ मार्च – प्रतिनिधी
सहकारासाठी दीपस्तंभ असलेल्या अमृत उद्योग समूहाचे संस्थापक थोर स्वातंत्र्य सेनानी सहकारमहर्षी भाऊसाहेब थोरात यांच्या १५ व्या पुण्यतिथीनिमित्त शुक्रवारी (१४ मार्च) सकाळी ९ वाजता अमृतेश्वर मंदिराजवळील प्रेरणास्थळ येथे माजी मंत्री बाळासाहेब थोरात व माजी आमदार डॉ. सुधीर तांबे यांच्या उपस्थितीत अभिवादन व पुष्पांजली कार्यक्रम आयोजित केल्याची माहिती कारखान्याचे अध्यक्ष बाबा ओहोळ यांनी दिली आहे.
अगदी तरुण वयात स्वातंत्र्यसंग्रामात उडी घेऊन ब्रिटिशांविरुद्ध लढा देणारे व स्वातंत्र्यप्राप्तीनंतर तालुक्यातील सर्वसामान्य व गोरगरीब माणसांच्या जीवनामध्ये सहकाराच्या माध्यमातून समृद्धी निर्माण करणारे स्वातंत्र्यसेनानी सहकारमहर्षी भाऊसाहेब थोरात यांचे जीवन कार्य हे पुढील पिढीसाठी सदैव प्रेरणादायी आहे.
त्यांनी सहकारात आर्थिक शिस्त, पारदर्शकता, काटकसर व आधुनिकता ही तत्वे रुजवली. ही तत्व आज देशासाठी अनुकरणीय ठरली आहे. याच तत्वांवर लोकनेते बाळासाहेब थोरात यांच्या मार्गदर्शनाखाली अमृत उद्योग समूहातील सर्व सहकारी संस्था आदर्शवत काम करत आहेत. सहकारमहर्षी भाऊसाहेब थोरात यांचे जन्मशताब्दी वर्ष संगमनेर तालुक्यात विविध उपक्रम राबवून मोठ्या उत्साहाने साजरे करण्यात आले आहे.
या कार्यक्रमासाठी आमदार सत्यजित तांबे, डॉ. जयश्रीताई थोरात, शेतकरी विकास मंडळाचे अध्यक्ष बाजीराव पा.खेमनर, जिल्हा बँकेचे उपाध्यक्ष ॲड. माधवराव कानवडे, माजी नगराध्यक्ष दुर्गाताई तांबे, कांचनताई थोरात, रणजीतसिंह देशमुख यांच्यासह समूहातील विविध संस्थांचे पदाधिकारी व मान्यवर उपस्थित राहणार आहेत.
तरी या अभिवादन कार्यक्रमासाठी तालुक्यातील नागरिकांनी उपस्थित राहावे, असे आवाहन कारखान्याचे कार्यकारी संचालक जगन्नाथ घुगरकर यांनी केले आहे.
