संगमनेर, दि. १२ मार्च – प्रतिनिधी
यावर्षी प्रथमत:च मोठ्या वादाची किनार लाभलेल्या संगमनेरमधील शिवजयंती उत्सवावर तोडगा काढण्यात प्रशासनाला अखेर यश आले आहे. वादग्रस्त ठरलेली जागा कोणालाही न देता शिवजन्मोत्सव सोहळा समितीला जोशी स्वीट होम जवळील सुप्रीम पावभाजी सेंटर समोरची जागा तर शिवसेना शिंदे गटाला चंदूकाका सराफ समोरील जागेवर उत्सव साजरा करण्यासाठी परवानगी देण्यात आली असल्याची माहिती समोर येत आहे.
सरकारी शिवजयंती मोठ्या जल्लोषात शिवसेना शिंदे गटाने साजरी केल्यानंतर देखील तिथीनुसार होणाऱ्या शिवजयंतीसाठी पुन्हा एकदा तयारी करण्यात आली होती. तर यावर्षी प्रथमच शिवजन्मोत्सव सोहळा समितीही जल्लोषात उत्सव साजरा करण्यासाठी तयारीला लागले होते. यासाठी त्यांनी प्रशासनाकडे रीतसर अर्ज करत बस स्थानकाच्या प्रवेशद्वाराशेजारी छत्रपती शिवाजी महाराजांचे मंदिर उभारण्याची परवानगी मागितली होती. तर याच जागेवर शिवसेना शिंदे गटाने ही आपला हक्क सांगत किल्ला बांधण्यासाठी तयारी केली. त्यामुळे दोन्ही गटांमध्ये वाद उफाळून आला होता. 
गेल्या तीन दिवसांपासून सुरू असलेल्या या वादामुळे तणावाचे वातावरण निर्माण झाले होते. या वादामध्ये प्रशासनाने मध्यस्थी करून देखील तोडगा निघत नसल्याने पोलिसांनी दोन्ही गटांनी लावलेल्या बॅरीगेटमध्ये दोन पोलीस व्हॅन उभ्या करून मोठा बंदोबस्त ठेवत या जागेवर कोणालाही काहीही करता येणार नाही यासाठी मज्जाव केला होता. त्यामुळे प्रशासनासोबत दोन्ही गटांचे बैठकांचे सत्र सुरू होते. कोणीही माघार घेण्यास तयार नसल्याने प्रशासनासमोर मोठा पेच निर्माण झाला होता. तसेच प्रशासन दबावाखाली देखील आल्याचे दिसत होते.
तिथीनुसार शिवजयंती साजरी करण्यासाठी संगमनेर बसस्थानक आवारातील मोकळी जागा वापरण्यास मिळावी या कळीच्या मुद्द्यावरून शिवसेना शिंदे गट आणि शिवजन्मोत्सव सोहळा समिती स्वाभिमानी संगमनेर शहर व तालुका यांच्यातील वाद विकोपाला गेला. दोन्ही गटात पोलिसांसमक्ष हमरीतुमरी, धराधरी झाल्यानंतर प्रशासन व पोलिसांनी बैठक घेतल्यानंतर सुद्धा तोडगा निघाला नसल्याने या दोन्ही गटांपैकी कोणाला परवानगी मिळते याकडे सर्वांचे लक्ष लागून होते. याबाबत पोलीस, प्रशासनाने सायंकाळपर्यंत कुठलाही निर्णय घेतला नसल्याने सध्या हे प्रकरण आणखी चिघळण्याची शक्यता निर्माण झाली होती.
विधानसभा निवडणुकानंतर नवीन आमदार मिळाल्याने आता शिवजयंती उत्सवात देखील गटबाजी आणि राजकारण सुद्धा मोठ्या प्रमाणावर सुरू झाले. देखावा सादर करण्यासाठी व शासनाची जागा मिळवण्यासाठी आजी-माजी आमदारांच्या कार्यकर्त्यांच्या समोरासमोर चकमकी घडत होत्या. यावर सत्तेच्या प्रचंड दबावाखाली असलेले पोलीस, प्रशासन अक्षरशः हतबल झाले असून अधिकारी कोणाच्या बाजूने निर्णय घ्यावा या पेचात सापडले असल्याचे दिसत होते. दरम्यान उशिराने या संदर्भात तोडगा काढण्यात प्रशासनाला यश आले आहे.
