संगमनेर, दि. १९ मार्च – प्रतिनिधी
कासारवाडी शिवारात असलेल्या मालपाणी हेल्थ क्लब येथील विवाह समारंभासाठी वापरल्या जाणाऱ्या मालपाणी पॅलेस मध्ये उभारण्यात आलेल्या स्टेजला बुधवारी दुपारी साडेतीन वाजण्याच्या सुमारास भीषण आग लागली. लागलेल्या आगीमध्ये एक जण गंभीर जखमी झाला असून त्याला उपचारासाठी रुग्णालयात हलविण्यात आले आहे. तर एक जण बचावला असल्याची माहिती समोर येत आहे.
घटनास्थळी अग्निशामक दल, रुग्णवाहिका, नगरपरिषद आणि हजर झाले आहे. आगीचे निश्चित कारण समजू शकले नसले तरी स्टेज उभारण्यासाठी वापरण्यात येणाऱ्या कटरच्या निर्माण झालेल्या ज्वालांमुळे थर्माकोलने पेट घेतल्याने ही घटना घडल्याचा प्राथमिक अंदाज आहे.
मालपाणी पॅलेसचा वापर विवाह समारंभासह अन्य काही कारणांसाठी केला जातो. बुधवारी दुपारी पॅलेसच्या या मैदानावर एका समारंभासाठी स्टेजची तयारी केली जात होती. ही तयारी अंतिम टप्प्यात असतानाच आगीची घटना घडल्याची माहिती समोर येत आहे. साडेतीन वाजण्याच्या सुमारास रखरखत्या उन्हात व्यासपीठावर तयार करण्यात आलेल्या डेकोरेशनने भेट घेतल्याने मोठा आगीचा भडका उडाला होता. क्षणातच आगीने मोठ्या प्रमाणात पेट घेतल्याने काही मिनिटातच समारंभासाठी उभे करण्यात आलेले व्यासपीठ जळून खाक झाले.
घटनास्थळी अग्निशामक दलाला प्राचारण करण्यात आले होते. संगमनेर नगर परिषदेचे उपमुख्य अधिकारी संजय पेखळे, बांधकाम अभियंता प्रशांत जुन्नरे, पाणीपुरवठा अभियंता अमृत काजवे, कार्यालयीन निरीक्षक राजेंद्र गुंजाळ, अमजद पठाण सतीश बुरुंगुले प्रवीण ताजने यांनी तात्काळ घटनास्थळी घाव घेतली. संगमनेर साखर कारखान्यासह काही अग्निशामकच्या मदतीने लागलेली आग विझविली जात होती.
आगीच्या ज्वाळा लांब वर पसरल्याने पॅलेसच्या कंपाउंड बाहेर असलेल्या उसाने देखील काही प्रमाणात पेट घेतला होता. आगी सोबतच ऊस वाचविण्याचे काम अग्निशामक दलाला करावे लागले.
दरम्यान या आगीमध्ये एक जण गंभीरित्या भाजला असल्याची माहिती समोर येत आहे. तर एक जण बचावला आहे. जखमींना तात्काळ खासगी रुग्णालयात उपचारासाठी दाखल करण्यात आले. घटनास्थळी मालपाणी उद्योग समूहाचे प्रमुख राजेश मालपाणी, मनीष मालपाणी उपस्थित होते. पोलीस उपाधीक्षक डॉ. कुणाल सोनवणे यांनीही घटनास्थळी भेट देऊन माहिती घेतली.
बंदी असलेल्या थर्माकोलचा वापर…
दरम्यान आगीच्या ठिकाणी मोठ्या प्रमाणात थर्माकोल आढळून आले असून या व्यासपीठासाठी थर्माकोलचा वापर करण्यात आल्याचे दिसून येत होते. बंदी असताना देखील मोठ्या प्रमाणात थर्माकोलचा वापर होत असल्याने संबंधितांवर काय कारवाई केली जाते याकडे लक्ष लागले आहे.
