संगमनेर, दि. २१ मार्च – प्रतिनिधी
संगमनेर खुर्द येथील नगरपालिकेच्या कचरा डेपोला काल (गुरुवारी) सायंकाळी भीषण आग लागली. या आगीमुळे परिसरात धुराचे मोठे साम्राज्य पसरले होते. यामुळे नागरिकांना श्वास घेण्यास त्रास होत होता, तसेच वाहतुकीलाही अडथळा निर्माण झाला होता.
संगमनेर खुर्द येथे नगरपालिकेचा कंपोस्ट डेपो आहे. संगमनेर शहर व उपनगरातील सर्व कचरा या डेपोत आणून टाकला जातो. तेथे या कचऱ्यावर प्रक्रिया केली जाते. गेल्या काही दिवसांपासून या डेपोत मोठ्या प्रमाणात कचरा साचला होता. या डेपोला काल सायंकाळी ६.३० वाजण्याच्या सुमारास अचानक आग लागली. या आगीने काही वेळातच रौद्ररूप धारण केले आणि धुराचे लोट परिसरात पसरले.
आगीची माहिती मिळताच संगमनेर नगरपालिकेच्या अग्निशमन दलाने तातडीने घटनास्थळी धाव घेतली. दोन अग्निशमन गाड्यांच्या मदतीने रात्री उशिरा ही आग विझवण्यात आली. आगीचे कारण अद्याप समजू शकलेले नाही.
आग विझल्यानंतरही परिसरात धुराचे मोठे साम्राज्य पसरले होते. या परिसरात मोठी लोकवस्ती आहे. हा कंपोस्ट डेपो इतर ठिकाणी हलवावा, अशी मागणी संगमनेर खुर्द परिसरातील नागरिक गेल्या अनेक वर्षांपासून करत आहेत. मात्र, अद्याप याबाबत कोणताही निर्णय झालेला नाही. हा वाद न्यायालयात प्रलंबित आहे.
या कंपोस्ट डेपोत मोठ्या प्रमाणात प्लास्टिक टाकले जाते, त्यामुळे आग लागल्यानंतर विषारी धूर तयार होतो. यामुळे परिसरातील वातावरण प्रदूषित झाले आहे, असे नागरिकांनी सांगितले. या कंपोस्ट डेपोत मोठ्या प्रमाणात कचरा टाकला जातो. कचरा टाकण्यासाठी जागा शिल्लक नसल्याने जाणीवपूर्वक आग लावली जात असावी, अशी शंका नागरिकांनी व्यक्त केली आहे. या कंपोस्ट डेपोमुळे परिसरातील नागरिकांचे आरोग्य धोक्यात आले आहे. हा कंपोस्ट डेपो अन्य ठिकाणी हलवावा, अशी मागणी नागरिकांकडून जोर धरत आहे.
याबाबत संगमनेर नगरपालिकेचे मुख्याधिकारी रामदास कोकरे यांनी सांगितले की, उन्हाळ्यात कचरा आपोआप पेट घेतो, त्यामुळे कंपोस्ट डेपोला आग लागण्याची शक्यता आहे.
