अकोले, दि. २३ मार्च – प्रतिनिधी
महिला बचत गटांनी तयार केलेल्या वस्तूंना योग्य बाजारपेठ मिळावी, यासाठी राज्य सरकार प्रयत्नशील आहे. या अंतर्गत राज्यात ५० ‘उमेद मॉल’ उभारण्याची योजना आहे. अकोले येथे योग्य जागा उपलब्ध झाल्यास येथेही ‘उमेद मॉल’ उभारण्यात येईल, अशी घोषणा महिला व बालविकास मंत्री आदिती तटकरे यांनी केली.
‘कळसुबाई’ महिला बचत गटांनी तयार केलेल्या वस्तूंच्या विक्री व प्रदर्शनाच्या उद्घाटनप्रसंगी त्या बोलत होत्या. या कार्यक्रमाला आमदार किरण लहामटे, पद्मश्री राहीबाई पोपेरे, अगस्ती सहकारी साखर कारखान्याचे अध्यक्ष सीताराम गायकर, जिल्हा ग्रामीण विकास यंत्रणेचे प्रकल्प संचालक राहुल शेळके, जिल्हा कार्यक्रम अधिकारी मनोज ससे, उमेद जिल्हा अभियान व्यवस्थापक सोमनाथ जगताप, तहसीलदार सिद्धार्थ मोरे, गटविकास अधिकारी अमर माने आदी मान्यवर उपस्थित होते.
आदिती तटकरे यांनी महिलांच्या आर्थिक सक्षमीकरणासाठी राज्य सरकार करत असलेल्या विविध योजनांची माहिती दिली. नागपूरमधील महिलांनी स्थापन केलेल्या यशस्वी पतसंस्थेचे उदाहरण देत त्यांनी राज्यातील इतर महिलांनाही अशा प्रकारे एकत्र येऊन आर्थिक विकास साधण्याचे आवाहन केले. ‘लाडकी बहीण’ योजनेमुळे राज्यातील लाखो महिलांना आर्थिक मदत मिळत असल्याचे त्यांनी सांगितले.
महिलांनी स्वतःच्या आरोग्याला प्राधान्य द्यावे, असे आवाहन त्यांनी केले. बचत गट मेळाव्यांसोबतच आरोग्य शिबिरांचे आयोजन करण्याची गरज त्यांनी व्यक्त केली. अंगणवाडी सेविका आणि मदतनीस यांच्या कुटुंबांसाठी मोफत आरोग्य तपासणी योजना सुरू करण्यात आल्याचे त्यांनी सांगितले. ‘उमेद’चा फिरता निधी १५ हजारांवरून ३० हजार करण्यात आल्याची माहिती त्यांनी दिली. ‘लखपती दीदी’ आणि ‘ड्रोन दीदी’ यांसारख्या उपक्रमांमुळे महिलांना मोठा लाभ होत असल्याचे त्यांनी नमूद केले.
कार्यक्रमात आमदार किरण लहामटे आणि इतर मान्यवरांनीही आपले विचार व्यक्त केले. ‘लाडकी बहीण’ योजनेच्या लाभार्थ्यांनी आपले अनुभव सांगितले. काही महिलांना प्रातिनिधिक स्वरूपात कर्ज योजनेचे धनादेश वाटप करण्यात आले. आदिती तटकरे यांनी महिला बचत गटांच्या स्टॉलला भेट देऊन त्यांच्याशी संवाद साधला. या प्रदर्शनात विविध बचत गटांचे १०० स्टॉल लावण्यात आले होते.
