१८ व्या संगमनेर फेस्टिवलचे दिमाखदार उद्घाटन; समीर चौगुलेंच्या ‘सम्या-सम्या मैफिलीत माझ्या’ने संगमनेरकर मनमुराद हसले

Annant Ppangarkar

महाराष्ट्र संवाद न्यूज ऑनलाईन-

तणावग्रस्त जीवनशैलीच्या काळात लोकांना हसवणे हे सर्वात मोठे पुण्याचे काम असून औषधांपेक्षा हास्याचे डोस अधिक गुणकारी आहेत, असे प्रतिपादन संगमनेर फेस्टिवलचे प्रणेते व उद्योगपती मनीष मालपाणी यांनी केले. 

राजस्थान युवक मंडळ, मालपाणी उद्योग समूह, संगमनेर नगरपरिषद, शहरातील सर्व गणेशोत्सव मंडळे आणि संगमनेरकरांच्या सहभागातून आयोजित १८ व्या संगमनेर फेस्टिवलचे शानदार उद्घाटन संगमनेरच्या नगराध्यक्ष डॉ. मैथिली तांबे यांच्या हस्ते मालपाणी लॉन्स येथे पार पडले.

पहिल्याच दिवशी ‘महाराष्ट्राची हास्यजत्रा’ फेम अभिनेते समीर चौगुले यांच्या ‘सम्या-सम्या मैफिलीत माझ्या’ या एकपात्री प्रयोगाने संगमनेरकरांना हसवून जिंकून घेतले.

उद्घाटनप्रसंगी व्यासपीठावर गीता परिवाराचे राष्ट्रीय कार्याध्यक्ष संजय मालपाणी, राजस्थान युवक मंडळाचे कार्याध्यक्ष सागर मणियार, उपाध्यक्ष कल्पेश मर्दा, सचिव कृष्णा असावा, खजिनदार वेणुगोपाल कलंत्री, कार्यकारिणी सदस्य सुमित अट्टल, विजय पतसंस्थेचे चेअरमन पराग सराफ आणि शारदा पतसंस्थेचे चेअरमन रोहित मणियार यांच्यासह विविध क्षेत्रांतील मान्यवर उपस्थित होते.

फेस्टिवलची १७ वर्षे पूर्ण होऊन १८ व्या वर्षात पदार्पण करत असताना, संगमनेरच्या रसिकांच्या भक्कम पाठिंब्यामुळेच देशपातळीवरील उत्तमोत्तम सांस्कृतिक कार्यक्रम येथे आणणे शक्य झाले, असे मनीष मालपाणी यांनी नमूद केले. यंदा कार्यक्रमांच्या देणगी प्रवेशिकांसाठी राजस्थान युवक मंडळाने विशेष ॲप विकसित केले असून ते बनवण्यात सुमित अट्टल यांनी विशेष योगदान दिले.

नगराध्यक्षा डॉ. मैथिली तांबे यांनी फेस्टिवलच्या ज्योतीला राजस्थान युवक मंडळ आणि मालपाणी परिवाराच्या सेवाभावाचे व सांस्कृतिक बांधिलकीचे प्रतीक सांगत उपक्रमाचे कौतुक केले.

सोहळ्याची सुरुवात सुरक्षा विभागाच्या शिस्तबद्ध सवाद्य पथसंचलनातून आणलेल्या ज्योत प्रज्वलनाने आणि श्री गणेशाच्या आरतीने झाली. ज्योत प्रज्वलित होताच झालेल्या आकर्षक इलेक्ट्रिक आतषबाजीने परिसर उजळून निघाला. प्रास्ताविक सागर मणियार यांनी केले, सूत्रसंचालन मालपाणी उद्योग समूहाचे ज्येष्ठ व्यवस्थापक रमेश घोलप यांनी केले, तर आभार कृष्णा असावा यांनी मानले.

पहिल्या दिवशी समीर चौगुले यांनी पु. ल. देशपांडे यांना गुरुस्थानी मानत प्रेमाच्या विषयापासून सुरुवात करून दोन तास प्रेक्षकांना दैनंदिन जीवन व नातेसंबंधांतील विनोदांनी भुरळ घातली. या सोहळ्याला संगमनेर शहर व परिसरातील रसिक नागरिक मोठ्या संख्येने उपस्थित होते.