संगमनेर, दि.२५ मार्च – प्रतिनिधी
जम्मू-काश्मीरमधील तंगधार येथे कर्तव्य बजावत असताना संगमनेर तालुक्यातील मेंढवण गावातील जवान रामदास साहेबराव बडे (वय ३८) यांना वीरमरण आले. त्यांच्या निधनाने संपूर्ण तालुक्यात शोककळा पसरली आहे.
रामदास बडे हे जम्मू-काश्मीरमधील तंगधार जिल्ह्यात नियंत्रण रेषेवर कर्तव्य बजावत होते. त्यावेळी त्यांचे निधन झाले. त्यांच्या निधनाचे नेमके कारण अद्याप समजू शकले नाही.
रामदास बडे हे ३४ एफ रेजिमेंटमध्ये हवालदार म्हणून कार्यरत होते. अत्यंत प्रतिकूल परिस्थितीत शिक्षण घेऊन ते सैन्यात भरती झाले होते. त्यांच्या निधनाने मेंढवण गावावर दुःखाचा डोंगर कोसळला आहे.
शहीद रामदास बडे यांच्या पार्थिवावर उद्या (बुधवार, २६ मार्च) दुपारी १ वाजता त्यांच्या मूळ गावी, मेंढवण येथे शासकीय इतमामात अंत्यसंस्कार करण्यात येणार आहेत. यावेळी लष्करी अधिकारी, स्थानिक प्रशासनातील अधिकारी व नागरिक उपस्थित राहणार आहेत.
रामदास बडे यांच्या पश्चात आई-वडील, पत्नी व दोन मुले असा परिवार आहे. त्यांच्या निधनामुळे कुटुंबावर दुःखाचा डोंगर कोसळला आहे. रामदास बडे यांच्या निधनाची बातमी अहिल्यानगर जिल्ह्यासह गावात वाऱ्यासारखी पसरली आणि संपूर्ण गावावर शोककळा पसरली. 
