मुंबई, दि. २९ मार्च – विशेष प्रतिनिधी
२६ नोव्हेंबर २००८ रोजी मुंबईवर झालेल्या दहशतवादी हल्ल्यात आपल्या प्राणांची आहुती देत दहशतवादी अजमल कसाबला जिवंत पकडणारे पोलीस कर्मचारी हुतात्मा तुकाराम ओंबळे यांच्या सन्मानार्थ महाराष्ट्र सरकारने मोठा निर्णय घेतला आहे.
राज्य सरकारच्या वतीने तुकाराम ओंबळे यांच्या शौर्याचे प्रतीक म्हणून सातारा जिल्ह्यातील केडंबे गावात भव्य स्मारक उभारण्यात येणार आहे. त्यासाठी १३.४६ कोटी रुपयांच्या खर्चाला मान्यता देण्यात आली आहे.
२००८ मध्ये झालेल्या या हल्ल्यात अजमल कसाब आणि त्याच्या सहकाऱ्यांनी मुंबईतील छत्रपती शिवाजी महाराज टर्मिनस, कामा रुग्णालय, लिओपोल्ड कॅफे, ताज हॉटेल यांसारख्या ठिकाणी मोठ्या प्रमाणात हिंसाचार केला होता. कामा रुग्णालयात हल्ला केल्यानंतर पळून जात असलेल्या अजमल कसाब आणि त्याच्या साथीदाराला मुंबई पोलिसांनी गिरगाव चौपाटीवर रोखले. कसाबला जिवंत पकडण्यासाठी तुकाराम ओंबळे यांनी अतुलनीय शौर्य दाखवले, पण यात त्यांना वीरमरण आले. त्यांच्या या शौर्यासाठी त्यांना मरणोत्तर अशोक चक्र देऊन गौरविण्यात आले.
२६ नोव्हेंबर २००८ रोजी झालेल्या या दहशतवादी हल्ल्यात १६६ निष्पाप नागरिकांनी आपले प्राण गमावले, तर शेकडो लोक जखमी झाले. या हल्ल्यातील १० पाकिस्तानी दहशतवाद्यांपैकी केवळ अजमल कसाब जिवंत पकडला गेला, ज्याला पकडण्यात तुकाराम ओंबळे यांनी मोलाची भूमिका बजावली.
या स्मारकाच्या माध्यमातून तुकाराम ओंबळे यांच्या शौर्याची गाथा कायम स्मरणात राहील आणि भावी पिढ्यांना प्रेरणा देत राहील.
