श्रीरामनवमी निमित्ताने रविवारी संगमनेरात विश्व हिंदू परिषद, बजरंग दलाची भव्य दिव्य शोभायात्रा

संगमनेर, दि. ३ एप्रिल – प्रतिनिधी
श्रीराम नवमीच्या पावन पर्वावर, विश्व हिंदू परिषद, बजरंग दल आणि दुर्गावाहिनी-मातृशक्ती यांच्या संयुक्त विद्यमाने संगमनेरात पश्चिम महाराष्ट्रातील सर्वात भव्य आणि दिव्य शोभायात्रा आयोजित करण्यात आली आहे.
ही शोभायात्रा रविवार, ६ एप्रिल २०२५ रोजी सायंकाळी ५ वाजता संगमनेरमधील अभिनवनगर येथील श्रीराम मंदिरातून निघेल. श्रीराम जन्मोत्सव रविवार, ६ एप्रिल रोजी दुपारी १२ वाजता साजरा केला जाईल. अहिल्यानगर जिल्ह्यातील सर्व बजरंग दल शाखा, प्रमुख मंदिरे, श्रीराम मंदिरे आणि हनुमान मंदिरांमध्ये विविध धार्मिक कार्यक्रमांचे आयोजन विश्व हिंदू परिषदेने केले आहे.
शोभायात्रेत भव्य धार्मिक देखावे, अयोध्येतील श्रीरामलल्लांची भव्य मूर्ती, महाबली हनुमानाची भव्य मूर्ती, केरळमधील पारंपारिक नृत्य आणि वाद्ये, श्रीराम रथ आणि श्रीराम पंचायत, भजनी मंडळे, उज्जैन महाकाल डमरू पथक, तैजूर ढोल ताशा पथक, सनई-चौघडे, घोडे आणि उंट, आकर्षक रोषणाई आणि फटाक्यांची आतिषबाजी यांचा समावेश असेल.
नवीन नगर रोड, छत्रपती शिवाजी महाराज स्मारक, चावडी, मेनरोड, सय्यद बाबा चौक, तेलीखुंट, नेहरू चौक, चंद्रशेखर चौक असा शोभायात्रेचा मार्ग असेल. शोभायात्रेची सांगता चंद्रशेखर चौकातील मोठ्या मारुती मंदिरात आणि श्रीराम मंदिरात महाआरतीने होईल.
या भव्य आणि दिव्य शोभायात्रेत सर्व हिंदू बंधू-भगिनींनी मोठ्या संख्येने सहभागी व्हावे, असे आवाहन विहिंप अहिल्यानगर जिल्हामंत्री विशाल वाकचौरे यांनी केले आहे.