आयुक्त बाबासाहेब मनोहरे यांनी स्वतःवर गोळी झाडून केला आत्महत्येचा प्रयत्न, प्रकृती गंभीर

रविवार, दि. ६ एप्रिल –
लातूर महानगरपालिकेचे आयुक्त बाबासाहेब मनोहरे (वय ५०) यांनी शनिवारी रात्री शासकीय निवासस्थानी स्वतःवर गोळी झाडून आत्महत्येचा प्रयत्न केला. या घटनेमुळे शहरात खळबळ उडाली आहे. गोळी डोक्यातून आरपार गेल्याने त्यांची प्रकृती चिंताजनक असून, त्यांच्यावर लातूरमधील सह्याद्री रुग्णालयात उपचार सुरू आहेत.
पोलिसांनी दिलेल्या माहितीनुसार, आयुक्‍त बाबासाहेब मनोहरे यांनी शनिवारी रात्री सुमारे सव्वा अकरा वाजता त्यांच्या शासकीय बंगल्यावरील एका खोलीत स्वतःच्या रिव्हॉल्व्हरमधून डोक्यात गोळी झाडून घेतली. गोळीचा आवाज ऐकून कुटुंबीयांनी तातडीने खोलीकडे धाव घेतली, तेव्हा ते रक्तबंबाळ अवस्थेत आढळले. त्यांना तत्काळ रुग्णालयात दाखल करण्यात आले.
सह्याद्री हॉस्पिटलचे संचालक डॉ. हनुमंत किनीकर यांनी सांगितले की, गोळी त्यांच्या डोक्याच्या उजव्या बाजूने घुसून आरपार निघाली आहे. या दुर्घटनेत त्यांच्या डोक्याची कवटी फुटली असून, मेंदूलाही गंभीर इजा झाली आहे. कवटीचे काही तुकडे मेंदूत पसरले आहेत. डॉक्टरांचे पथक त्यांची प्रकृती स्थिर ठेवण्यासाठी शर्थीचे प्रयत्न करत आहे. त्यांच्यावर तातडीने शस्त्रक्रिया करण्यात आली असून, सध्या ते अतिदक्षता विभागात आहेत. त्यांची प्रकृती अजूनही नाजूक आहे.
मिळालेल्या माहितीनुसार, शनिवारी रात्री मनोहरे यांनी कुटुंबासोबत जेवण केले आणि नेहमीप्रमाणे गप्पा मारल्या. त्यानंतर ते त्यांच्या खोलीत गेले आणि काही वेळातच गोळी झाडल्याचा आवाज आला.
बाबासाहेब मनोहरे हे त्यांच्या कठोर शिस्त आणि स्पष्टवक्तेपणासाठी ओळखले जातात. त्यांनी यापूर्वी धाराशिव आणि नांदेड जिल्ह्यांमध्ये महत्त्वाच्या पदांवर काम केले होते. लातूर महानगरपालिकेत त्यांनी सुरुवातीला अतिरिक्त आयुक्त म्हणून काम पाहिले आणि नंतर त्यांची आयुक्तपदी नियुक्ती झाली. त्यांनी आपल्या कार्यकाळात महानगरपालिकेचा कारभार उत्तम प्रकारे चालवला होता. त्यांच्यासारख्या कर्तव्यदक्ष अधिकाऱ्याने आत्महत्येसारखे टोकाचे पाऊल का उचलले, याचे कारण अद्याप अस्पष्ट आहे.
घटनेची माहिती मिळताच पोलीस आणि प्रशासनातील उच्च अधिकाऱ्यांनी तातडीने सह्याद्री रुग्णालयाकडे धाव घेतली. लातूर पोलिसांनी मनोहरे यांच्या निवासस्थानी जाऊन पंचनामा केला असून, या घटनेचा कसून तपास सुरू आहे.