संगमनेर, दि.१२ एप्रिल – प्रतिनिधी
संगमनेर शहरात हनुमान जयंतीनिमित्त आयोजित रथाच्या मिरवणुकीत एक ब्रिटिशकालीन अनोखी परंपरा पाहायला मिळाली. परंपरेनुसार, शहर पोलीस ठाण्याचे पोलीस निरीक्षक रवींद्र देशमुख आणि त्यांच्या सहकाऱ्यांनी आणलेला मानाचा ध्वज रथावर लावण्यात आला. त्यानंतर महिलांनी मोठ्या उत्साहात आणि आनंदात हनुमान रथाचा दोर धरून ओढण्यास सुरुवात केली.
या मिरवणुकीत संगमनेरचे नवनिर्वाचित आमदार अमोल खताळ आणि त्यांच्या पत्नी नीलम खताळ यांनीही सहभाग घेतला होता. महिलांनी रथ ओढल्यानंतर काही वेळातच मिरवणुकीत सहभागी असलेल्या ढोल पथकाला रथापुढे ढोल वाजविण्यापासून रोखत रथ पुढे नेण्याचा प्रयत्न झाल्याने निर्माण झालेल्या वादामुळे वातावरण काहीसे तणावपूर्ण झाले. हिंदू राजा प्रतिष्ठानच्या ढोल पथकातील कार्यकर्ते आणि मिरवणूक आयोजक कार्यकर्त्यांमध्ये जोरदार वाद झाला. यात एकमेकाला धक्काबुक्की देखील करण्यापर्यंत मजल गेली.
महिलांच्या अनेक वर्षांच्या रथ ओढण्याच्या परंपरेला या वादामुळे गालबोट लागले. काही काळ या गोंधळामुळे महिलांच्या सुरक्षिततेचा प्रश्नही निर्माण झाला होता. कार्यकर्त्यांमध्ये बाचाबाची झाली आणि त्याचे पर्यवसान आमदार अमोल खताळ यांच्यासमोरच फ्री स्टाईल धक्काबुक्की करण्यात झाले. पोलिसांनी तातडीने हस्तक्षेप करत दोन्ही गटातील कार्यकर्त्यांना बाजूला केले आणि त्यानंतर मिरवणूक पुन्हा मार्गस्थ झाली.
कार्यकर्त्यांमध्ये झालेल्या या हाणामारीमुळे काही काळ मानापमान नाट्य रंगले होते. रथ मिरवणूक सुरू झाल्यानंतर नेमके कोणामध्ये वाद झाला, याचे नेमके कारण मात्र समजू शकले नाही.
दरम्यान, संगमनेरच्या माजी नगराध्यक्ष दुर्गाताई तांबे आणि युवक काँग्रेसच्या अध्यक्षा डॉ. जयश्री थोरात यांनीही मिरवणुकीत सहभाग घेतला होता. शेकडो संगमनेरकर महिला या गावाच्या उत्साहात सहभागी झाल्या होत्या. मात्र, कार्यकर्त्यांच्या वादाच्या या घटनेमुळे मिरवणुकीच्या उत्साहावर काही प्रमाणात विरजण पडले होते.
चंद्रशेखर चौकातून निघालेला रथ शहराच्या विविध मार्गावरून पुन्हा दुपारी चंद्रशेखर चौकात आल्यानंतर मिरवणुकीची सांगता झाली.
हनुमान रथ मिरवणुकीतील विविध छायाचित्रे छायाचित्रकार राजेंद्र सुतार यांच्या कॅमेऱ्यातून ‘महाराष्ट्र संवाद’च्या वाचकांसाठी…
