महाराष्ट्र संवाद न्यूज
नाशिक, दि.१२ एप्रिल –
नाशिक जिल्हा न्यायालयातील जिल्हा न्यायाधीश आर.आर. राठी यांची तडकाफडकी पदमुक्त करण्यात आले आहे. मुंबई उच्च न्यायालयाच्या आदेशाने ही कारवाई झाली असून, जिल्हा सत्र न्यायाधीश न्या. जगमलानी यांनी यापूर्वी या प्रकरणाची चौकशी केली होती. या कारवाईमुळे न्यायालयीन वर्तुळात खळबळ उडाली आहे.
शुक्रवारी (दि.११ एप्रिल) सकाळी जिल्हा न्यायालयात नेहमीप्रमाणे कामकाज सुरू झाले आणि न्यायाधीश राठी यांनी सकाळी १० वाजता कार्यालयात नियमितपणे हजेरी लावली. त्यांनी आपल्या दैनंदिन कामकाजाला सुरुवात केली. त्यानंतर, त्यांची प्रमुख जिल्हा न्यायाधीशांशी (Principal District Judge) काही वेळ चर्चा झाली आणि त्यानंतर त्यांना बदलीचे पत्र देण्यात आले.
दरम्यान राठी यांच्या संदर्भात न्यायालयीन कामकाजात काही अनियमितता असल्याच्या तक्रारी होत्या. मुंबई उच्च न्यायालयाच्या मुख्य न्यायमूर्तींनी जिल्हा न्यायाधीश राठी यांना पदमुक्त करण्यात यावे अशा आशयाचे पत्र प्रमुख जिल्हा न्यायाधीशांना पाठवले होते. त्यानुसार, ही तातडीची कारवाई करण्यात आली. न्यायालयात या बदलीच्या निर्णयाची जोरदार चर्चा सुरू आहे.
