महाराष्ट्र संवाद न्यूज – संगमनेर
स्पर्धा परीक्षेच्या माध्यमातून संगमनेरमधील अविष्कार नरेश राणे याने मोठे यश मिळविले आहे. वयाच्या अवघ्या २४ व्या वर्षी त्याची युनियन बँक ऑफ इंडियामध्ये वर्ग १ या पदावर बँक अधिकारी म्हणून निवड झाली आहे. त्याच्या या यशाबद्दल सर्वत्र कौतुक होत आहे.
जिद्द, चिकाटी आणि सातत्याने अभ्यासाच्या बळावर यश मिळविणाऱ्या अविष्कार याच्या वडिलांचा संगमनेरमध्ये प्रिंटिंग प्रेसचा छोटासा व्यवसाय असून आई गृहिणी आहे तर, संगमनेरमधील सराफ विद्यालयातील सेवानिवृत्त शिक्षक चंद्रकांत राणे व सुनील राणे यांचा आविष्कार हा पुतण्या आहे.
एमएससी (मॅथ) करत असताना अविष्कार याने दुसरीकडे स्पर्धा परीक्षांची देखील तयारी सुरू केली होती. घरची आर्थिक परिस्थिती अत्यंत बेताची असतानाही त्याने पहिल्याच प्रयत्नात हे मोठे यश मिळविले आहे. स्पर्धा परीक्षांची तयारी करणाऱ्या अन्य विद्यार्थ्यांसाठी त्याचा हा अनुभव मार्गदर्शक ठरेल.
या यशाबद्दल युनियन बँक ऑफ इंडियाचे सेवानिवृत्त वरिष्ठ अधिकारी तथा अमृतवाहिनी सहकारी बँकेचे अध्यक्ष सुधाकर जोशी, संगमनेर तालुका सहकारी दूध उत्पादक संघाचे कार्यकारी संचालक डॉ. सुजित खिलारी, युनियन बँक ऑफ इंडिया घुलेवाडी शाखेचे वरिष्ठ शाखा व्यवस्थापक पवार, सहकार खात्याचे सेवानिवृत्त उपनिबंधक ॲड. अनिल भांगरे, शाश्वत इंटरप्राईजेसचे संचालक ॲड. प्रमोद कडलग, राजेंद्र बोरुडे यांनी अविष्कार याचा सत्कार करत त्याने मिळविलेल्या यशाबद्दल कौतुक केले आहे.
