महाराष्ट्र संवाद न्यूज – छत्रपती संभाजी नगर
पोलिसातून निलंबित असलेले वादग्रस्त पोलीस अधिकारी रणजीत कासले यांना १८ एप्रिल २०२५ रोजी अखेर पोलीस दलातून बडतर्फ करण्यात आले आहे. छत्रपती संभाजीनगर परिक्षेत्राचे विशेष पोलीस महानिरीक्षक विरेंद्र मिश्रा यांनी ही कारवाई केली आहे.
सध्या कासले एका ॲट्रॉसिटीच्या गुन्ह्यात पुणे पोलिसांच्या ताब्यात असून, शिवाजीनगर पोलिसांनी त्यांना अटक केली असून तीन दिवसांची पोलीस कोठडी सुनावण्यात आली आहे.
बीड जिल्हा पोलीस दलातील सायबर विभागात कार्यरत असताना, एका गुन्ह्याच्या तपासासाठी गुजरातला गेलेल्या कासले यांनी पैशांच्या बदल्यात आरोपीला सोडले होते, या संबंधीचा एक व्हिडिओ व्हायरल झाला होता. यासोबतच, नागरिकांना सायबर गुन्हे दाखल करण्याच्या धमक्या दिल्याचाही त्यांच्यावर आरोप आहे. याच पार्श्वभूमीवर २३ एप्रिल २०२४ रोजी त्यांना सेवेतून निलंबित करण्यात आले होते.
निलंबनानंतर चौकशीसाठी अनेक नोटिसा बजावूनही कासले गैरहजर राहिले. दरम्यान, सोशल मीडियावर त्यांनी सातत्याने आपली भूमिका मांडली. विशेष म्हणजे, वाल्मीक कराड यांच्या एन्काऊंटरसाठी आपल्याला सुपारी मिळाली होती, असा खळबळजनक दावा त्यांनी केला, ज्यामुळे पोलीस दलात मोठी चर्चा सुरू झाली. काही काळानंतर, आपण एकटे लढू शकत नाही असे म्हणत त्यांनी पोलिसांपुढे शरणागती पत्करली. या सर्व घटनांच्या पार्श्वभूमीवर त्यांची अखेर बडतर्फी झाली आहे.
