महाराष्ट्र संवाद न्यूज – संगमनेर
संगमनेर शहरातील मदिनानगर येथे गोवंश जनावरांची कत्तल केल्याची घटना उघडकीस आली आहे. याप्रकरणी पोलिसांनी गुलाम साबेर कुरेशी याच्यासह एका अनोळखी व्यक्ती विरोधात गुन्हा दाखल केला. आरोपीच्या शेडमधून सुमारे ९०० किलो रिट्स कार मधून ६०० किलो गोमांस आणि कत्तल करण्यासाठी बांधून ठेवलेली चार जनावरे जप्त केली आहेत.
संगमनेरचे पोलीस उपअधीक्षक डॉ. कुणाल सोनवणे यांना मदिनानगरमध्ये गोवंश जनावरांची कत्तल होत असल्याची गुप्त माहिती मिळाली होती. या माहितीच्या आधारे त्यांनी आपल्या कार्यालयातील पोलीस कॉन्स्टेबल राहुल सारबंदे, पोलीस नाईक राहुल डोके यांना कारवाईचे आदेश दिले.
पोलीस अधीक्षकांच्या पथकातील राहुल सारबंदे आणि राहुल डोके यांनी रविवारी रात्रपाळीच्या गस्तीवर असलेल्या संगमनेर शहर पोलीस ठाण्याचे पोलीस उपनिरीक्षक इम्रान खान व पोलीस कॉन्स्टेबल शशिकांत दाभाडे यांच्यासह पंचांना सोबत घेत मिळालेल्या माहितीच्या आधारे मध्यरात्री तीन वाजण्याच्या सुमारास शेडवर छापा टाकला. त्यावेळी गुलाम कुरेशी आणि त्याचा एक साथीदार पोलिसांना पाहून पळून गेले. पोलिसांनी शेडची तपासणी केली असता, तिथे जनावरांचे मांस आणि कत्तल करण्यासाठी बांधलेली जनावरे आढळून आली.
पोलिसांनी घटनास्थळावरून ३,७५,००० रुपये किमतीचे १५०० किलो गोमांस, ३,००,००० रुपये किमतीची एक मारुती सुझुकी रिट्झ कार, ६०,००० रुपये किमतीच्या ३ मोठ्या काळ्या गाई आणि ५००० रुपये किमतीचे एक वासरू जप्त केले. पोलिसांनी जप्त केलेले मांस रासायनिक तपासणीसाठी पाठवले असून, जनावरांना जीवदया गोशाळा, सायखिंडी येथे हलवले आहे.
संगमनेर शहर पोलीस ठाण्यात पोलीस कॉन्स्टेबल राहुल सारबंदे यांनी दिलेल्या फिर्यादीवरून गुलाम कुरेशी आणि त्याच्या साथीदारावर भारतीय न्याय संहिता २०२३ च्या कलम २७१, ३२५, ३(५), प्राण्यांना क्रूर वागणूक प्रतिबंधक अधिनियम १९६० च्या कलम ३,११ आणि महाराष्ट्र पशु संरक्षण अधिनियम १९७६ च्या कलम ५(क), ९(अ) अंतर्गत गुन्हा दाखल करण्यात आला आहे. पोलीस पुढील तपास करत आहेत.
