संगमनेर – प्रतिनिधी
सहकार महर्षी भाऊसाहेब थोरात सहकारी साखर कारखाना निवडणुकीत माजी मंत्री बाळासाहेब थोरात यांची राजकीय खेळी यशस्वी ठरली आहे. सोमवारी ६८ उमेदवारांनी माघार घेतल्याने २१ जागांपैकी २० जागा बिनविरोध झाल्या आहेत. धांदरफळ गटातील एका जागेचा निर्णय बाकी असून, तोही लवकरच होऊन कारखाना निवडणूक पूर्णपणे बिनविरोध होण्याची शक्यता आहे.
बुधवारी (दि. ९) अर्ज दाखल करण्याच्या शेवटच्या दिवशी १३३ उमेदवारी अर्ज दाखल झाले होते. सोमवारी (दि. १५) छाननीत २० अर्ज बाद झाले, तर चार उमेदवारांनी माघार घेतली. त्यामुळे २१ जागांसाठी १०९ उमेदवार रिंगणात होते. मात्र, बाळासाहेब थोरात यांच्या आवाहनाला मान देत अनेक उमेदवारांनी अर्ज माघार घेतल्याने २० जागा बिनविरोध झाल्या.
बाळासाहेब थोरातांची राजकीय खेळी… माजी मंत्री बाळासाहेब थोरात यांनी या निवडणुकीत लक्ष केंद्रित करून विरोधकांना चितपट केले आहे. विधानसभेतील पराभवाचा बदला घेतल्याची चर्चा तालुक्यात रंगली आहे. कारखाना निवडणूक बिनविरोध झाल्याने काँग्रेस कार्यकर्त्यांचे मनोबल वाढले आहे. आगामी जिल्हा परिषद, पंचायत समिती आणि नगरपालिका निवडणुकीसाठी थोरात यांनी मोठी राजकीय खेळी खेळली आहे.
अंतिम निर्णय लवकरच… धांदरफळ गटातील एका जागेचा निर्णय एक-दोन दिवसांत होऊन निवडणूक बिनविरोध झाल्याची अधिकृत घोषणा होणार आहे.
बिनविरोध झालेले गट आणि उमेदवार:
* उत्पादक सहकारी संस्था, बिगर उत्पादक संस्था व पणन संस्था गट (१ जागा): बाळासाहेब थोरात
* साकुर गट (३ जागा): इंद्रजित खेमनर, सतीशचंद्र वर्पे, रामदास धुळगंड
* तळेगाव गट (३ जागा): संपतराव गोडगे, नवनाथ अरगडे, रामनाथ कुटे
* धांदरफळ गट (३ जागा): पांडुरंग घुले, विनोद हासे (एका जागेचा निर्णय बाकी)
* अकोले जवळे गट (३ जागा): गुलाब सयाजी देशमुख, संतोष रखमा हासे, अरुण सोन्याबापू वाकचौरे
* अनुसूचित जाती जमाती गट (१ जागा): योगेश भालेराव
* महिला गट राखीव (२ जागा): लताताई गायकर, सुंदराबाई डुबे
* इतर मागासवर्ग गट (१ जागा): अंकुश ताजणे
* भटक्या विमुक्त जाती जमाती गट (१ जागा): दिलीप श्रीहरी नांगरे
