महाराष्ट्र संवाद न्यूज – मुंबई
महाराष्ट्र शासनाच्या वतीने आयोजित ‘राजीव गांधी प्रशासकीय गतिमानता अभियान’ स्पर्धेत संगमनेर नगर परिषदेचे मुख्याधिकारी रामदास कोकरे यांनी उत्कृष्ट कामगिरी करत राज्याचा प्रतिष्ठित पुरस्कार पटकावला आहे. राज्याचे मुख्यमंत्री देवेंद्र फडणवीस यांच्या हस्ते त्यांना सन्मानचिन्ह देऊन गौरविण्यात आले.
महाराष्ट्र शासनाच्या वतीने नागरी सेवा दिन २०२५ च्या निमित्ताने राज्यातील नगरपालिका, महानगरपालिका तसेच शासकीय अधिकारी आणि कर्मचाऱ्यांसाठी ‘राजीव गांधी प्रशासकीय गतिमानता प्रगती अभियान’ अंतर्गत सन २०२३-२०२४ आणि सन २०२४-२०२५ या वर्षांसाठी राज्यस्तरीय स्पर्धा आयोजित करण्यात आली होती.
या स्पर्धेत शासकीय अधिकारी म्हणून मुख्याधिकारी रामदास कोकरे यांनी वृक्ष संगोपन व संवर्धनासाठी ‘सीड बँक’ ही नाविन्यपूर्ण संकल्पना सादर केली. कोकरे यांच्या या उत्कृष्ट कार्याची दखल घेत महाराष्ट्र शासनाने त्यांचा विशेष सन्मान केला.
दिनांक २१ एप्रिल रोजी मुंबई येथील सह्याद्री राज्य अतिथी गृहात आयोजित एका विशेष समारंभात मुख्यमंत्री देवेंद्र फडणवीस यांच्या हस्ते आणि राज्याच्या मुख्य सचिव श्रीमती सुजाता सौनिक यांच्यासह इतर मान्यवरांच्या उपस्थितीत रामदास कोकरे यांना पारितोषिक आणि सन्मानचिन्ह प्रदान करण्यात आले.
मुख्याधिकारी रामदास कोकरे यांच्या या उल्लेखनीय यशाबद्दल संगमनेर शहरात आनंदाचे वातावरण आहे. त्यांच्या कार्याचा गौरव झाल्याबद्दल सर्व स्तरांतून त्यांचे अभिनंदन होत आहे. ‘सीड बँक’ सारख्या अभिनव उपक्रमातून त्यांनी पर्यावरणाचे जतन आणि संवर्धन करण्याच्या दृष्टीने उचललेले पाऊल निश्चितच प्रेरणादायी आहे, असे नागरिकांचे मत आहे.
