कळसेश्वर विद्यालयाचे पूर्व माध्यमिक शिष्यवृत्ती परीक्षेत उत्कृष्ट यश; पाच विद्यार्थ्यांची उज्ज्वल कामगिरी

कळस – प्रतिनिधी
अगस्ती एज्युकेशन सोसायटी, मुंबई संचलित कळस येथील कळसेश्वर विद्यालयातील इयत्ता आठवीच्या विद्यार्थ्यांनी पूर्व माध्यमिक शिष्यवृत्ती परीक्षेत उत्कृष्ट यश संपादन केले आहे. विद्यालयातील तब्बल पाच विद्यार्थ्यांनी गुणवत्ता यादीत स्थान मिळवत संस्थेचे नाव रोशन केले आहे.
या परीक्षेत आर्या गोपीनाथ ढगे हिने १६८ गुण मिळवून विद्यालयात प्रथम क्रमांक पटकावला, तर सृष्टी धनराज वाकचौरे १६६ गुणांसह द्वितीय क्रमांकाची मानकरी ठरली. याशिवाय, सार्थक दत्तात्रय ढगे (१३६ गुण), श्रुतिक संजय वाकचौरे (१३४ गुण) आणि नैतिक ज्ञानेश्वर बोऱ्हाडे (१३२ गुण) यांनीही गुणवत्ता यादीमध्ये स्थान मिळवले आहे.
विद्यार्थ्यांच्या या नेत्रदीपक यशाबद्दल मुख्याध्यापक भाऊसाहेब घेलवडे यांनी समाधान व्यक्त केले. माजी मुख्याध्यापिका नंदा बिबवे आणि शिक्षक शिवाजी आवारी, मच्छिंद्र साळुंखे, गीतांजली खरबस, केशव महाले, मनीषा शिंदे, प्रतीक्षा घुले, कुमार पालवे यांनी या विद्यार्थ्यांना विशेष मार्गदर्शन केले. त्यांच्या अथक प्रयत्नांमुळेच हे विद्यार्थी उत्तम यश संपादन करू शकले.
विद्यालयाच्या या दैदिप्यमान कामगिरीबद्दल संस्थेच्या सेक्रेटरी शैलजा पोखरकर, कार्याध्यक्ष शिरीष नाईकवाडी, सतीश नाईकवाडी, संदीप नाईकवाडी, जिल्हा परिषदेचे माजी सभापती कैलासराव वाकचौरे आणि सोन्याबापू वाकचौरे यांनी सर्व यशस्वी विद्यार्थ्यांचे अभिनंदन केले आहे. या यशाने कळसेश्वर विद्यालयाच्या शिरपेचात आणखी एक मानाचा तुरा रोवला गेला आहे.