महाराष्ट्र संवाद न्यूज – अहिल्यानगर
अहिल्यानगर जिल्ह्यातील नागरिकांसाठी हवामान खात्याने एक महत्त्वपूर्ण अलर्ट दिला आहे. येत्या ३ ते ६ मे २०२५ या कालावधीत जिल्ह्याच्या काही भागात वीजांच्या कडकडाटासह वादळी वाऱ्यासह हलक्या ते मध्यम स्वरूपाच्या पावसाची शक्यता वर्तवण्यात आली आहे. या पार्श्वभूमीवर जिल्हा प्रशासनाने ‘यलो अलर्ट’ जारी करत नागरिकांना सतर्क राहण्याचे आवाहन केले आहे.
हवामान खात्याच्या अंदाजानुसार, येत्या ३ ते ६ मे २०२५ हे तीन दिवस जिल्ह्यात मेघगर्जना आणि विजांचा कडकडाट होण्याची शक्यता आहे. त्यामुळे नागरिकांनी विशेष काळजी घेणे आवश्यक आहे.
प्रशासनाचे महत्वाचे सूचना आणि मार्गदर्शन:
* मेघगर्जना होत असताना, विजा चमकत असताना किंवा जोरदार वारे वाहत असताना झाडाखाली किंवा झाडांजवळ उभे राहू नका. सुरक्षित ठिकाणी आश्रय घ्या.
* गडगडाटी वादळात आणि वीज चमकत असताना कोणत्याही विद्युत उपकरणांचा वापर टाळा.
* वीजेच्या सुवाहक भागांपासून दूर राहा. ट्रॅक्टर, शेती अवजारे, मोटारसायकल किंवा सायकल यांपासून दूर राहा.
* मोकळी मैदाने, झाडांखाली, टॉवर्स, ध्वजांचे खांब, विजेचे खांब, धातूचे कुंपण, विद्युतवाहिन्या किंवा ट्रान्सफॉर्मरजवळ थांबू नका.
* अधोरेखित किंवा लोंबकळणाऱ्या केबल्सपासून दूर राहा.
* जाहिरात फलक कोसळून अपघात होण्याची शक्यता असल्याने त्यांच्या आसपास थांबू नका आणि योग्य ती दक्षता घ्या.
* वीज चमकत असताना मोकळ्या जागेत असल्यास, जमिनीशी कमीतकमी संपर्क साधण्यासाठी गुडघ्यांवर बसा आणि दोन्ही हातांनी कान झाकून डोके गुडघ्यांमध्ये झाका.
* धरण आणि नदी क्षेत्रात पर्यटनासाठी जाणाऱ्या नागरिकांनी विशेष खबरदारी घ्यावी. पाण्याच्या प्रवाहात उतरू नये आणि धोकादायक ठिकाणी सेल्फी काढू नये.
* वादळी वारा, पाऊस आणि गारपीट यामुळे शेतीमालाचे नुकसान टाळण्यासाठी शेतकऱ्यांनी वेळीच नियोजन करावे.
* शेतकऱ्यांनी आपला शेतमाल सुरक्षित ठिकाणी साठवावा. बाजार समितीमध्ये विक्रीसाठी आणलेला माल सुरक्षित ठेवावा.
* जनावरांना सुरक्षित ठिकाणी हलवावे आणि त्यांचे संरक्षण करावे.
आपत्कालीन परिस्थितीत मदतीसाठी जवळच्या तहसील कार्यालयाशी, पोलीस स्टेशनशी किंवा जिल्हा नियंत्रण कक्ष, जिल्हाधिकारी कार्यालय, अहमदनगर येथे १०७७ (टोल फ्री) किंवा ०२४१- २३२३८४४ / २३५६९४० या क्रमांकावर संपर्क साधावा, असे आवाहन जिल्हा प्रशासनाने केले आहे. नागरिकांनी सतर्क राहून प्रशासनाला सहकार्य करावे, असेही सांगण्यात आले आहे.
