महाराष्ट्र संवाद न्यूज –
उच्च माध्यमिक प्रमाणपत्र (HSC) म्हणजेच इयत्ता बारावी परीक्षेचा निकाल उद्या, (सोमवार ५ मे) जाहीर होणार आहे. महाराष्ट्र राज्य माध्यमिक आणि उच्च माध्यमिक शिक्षण मंडळातर्फे (MSBSHSE) फेब्रुवारी-मार्च २०२५ मध्ये घेण्यात आलेल्या या परीक्षेचा निकाल दुपारी १ वाजल्यापासून विद्यार्थ्यांना ऑनलाईन पाहता येणार आहे.
मंडळाने जारी केलेल्या अधिसूचनेनुसार, निकालाची घोषणा पत्रकार परिषदेत केली जाईल. त्यानंतर, विद्यार्थी मंडळाच्या अधिकृत संकेतस्थळाला भेट देऊन आपली गुणपत्रिका डाऊनलोड करू शकतील.
उत्तरपत्रिका पडताळणी आणि पुनर्मूल्यांकनासाठी संधी: ऑनलाईन निकालानंतर, विद्यार्थ्यांना त्यांच्या अनिवार्य विषयांपैकी कोणत्याही विषयात मिळालेल्या गुणांची पडताळणी, उत्तर पत्रिकांच्या छायाप्रती आणि पुनर्मूल्यांकनासाठी अर्ज करण्याची सोय मंडळाने उपलब्ध करून दिली आहे. विद्यार्थी यासाठी ६ मे ते २० मे २०२५ या कालावधीत मंडळाच्या अधिकृत संकेतस्थळावरून किंवा स्वतः कनिष्ठ महाविद्यालयामार्फत अर्ज करू शकतील.
दरम्यान, दरवर्षी निकालाच्या दिवशी वेबसाईटवर मोठ्या प्रमाणात विद्यार्थ्यांची गर्दी होते, ज्यामुळे निकाल पाहण्यास विलंब होऊ शकतो. मात्र, यावर्षी माहिती तंत्रज्ञान मंत्री आशिष शेलार यांनी वेबसाईटची क्षमता वाढवण्याचे आणि सायबर सुरक्षा व्यवस्था अधिक मजबूत करण्याचे निर्देश दिले आहेत. त्यामुळे विद्यार्थ्यांना यंदा निकाल पाहताना कोणतीही अडचण येणार नाही, अशी शक्यता वर्तवण्यात येत आहे.
विद्यार्थी खालील अधिकृत वेबसाईटवर आपला निकाल पाहू शकतील:
http://hscresult.mkcl.org
www.mahahssboard.in
Results.targetpublications.org
Results.navneet.com
www.mahresult.nic.in
निकाल पाहण्याची सोपी प्रक्रिया:
* महाराष्ट्र बोर्डाच्या अधिकृत वेबसाईटला भेट द्या: www.mahresult.nic.in
* होमपेजवरील “HSC Examination Result 2025” या लिंकवर क्लिक करा.
* तुमचा सीट नंबर आणि तुमच्या आईचे पहिले नाव प्रविष्ट करा.
* “Submit” बटणावर क्लिक करा.
* निकाल तुमच्या स्क्रीनवर दिसेल. तुम्ही तो डाउनलोड करून प्रिंटही करू शकता.
SMS द्वारेही पाहता येणार निकाल: विद्यार्थ्यांना मोबाईलवर SMS द्वारे देखील निकाल पाहता येणार आहे. यासाठी त्यांनी आपल्या मोबाईलच्या मेसेज बॉक्समध्ये MHSSC टाइप करून 57766 या क्रमांकावर पाठवावे.
