महाराष्ट्र संवाद न्यूज –
सध्या डिजिटल पेमेंटच्या जमान्यात गुगल पे आणि फोन पे चा वापर मोठ्या प्रमाणात वाढला आहे. मात्र, याच ऑनलाइन पेमेंटमुळे एका तरुणीला मनस्ताप सहन करावा लागला आहे.
वाघोली ते विमाननगर असा प्रवास करणाऱ्या एका २६ वर्षीय तरुणीने रिक्षाभाडे म्हणून केवळ २० रुपये गुगल पे द्वारे भरले आणि याच कारणामुळे एका रिक्षाचालकाने तिला अश्लील व्हिडिओ आणि मेसेज पाठवून तिचा विनयभंग केला. या घृणास्पद कृत्याबद्दल पुण्याच्या हडपसर पोलीस ठाण्यात आरोपी रिक्षाचालकाविरुद्ध गुन्हा दाखल करण्यात आला आहे.
पोलिसांनी दिलेल्या माहितीनुसार, पीडित तरुणी वाघोलीहून विमाननगरला रिक्षाने जात होती. तिने रिक्षाचे भाडे ऑनलाइन पद्धतीने चुकते केले. त्यामुळे तिचा मोबाईल नंबर रिक्षाचालकाकडे गेला. याच संधीचा गैरफायदा घेत आरोपीने तिच्या मोबाईलवर वारंवार अश्लील व्हिडिओ आणि संदेश पाठवण्यास सुरुवात केली. इतकेच नव्हे, तर त्याने व्हिडिओ कॉल करून तिच्याशी अश्लील बोलण्याचा प्रयत्न देखील केला.
पीडित तरुणीने सुरुवातीला त्याचा मोबाईल नंबर ब्लॉक केला. मात्र, आरोपी इतका निर्लज्ज होता की त्याने दुसऱ्या मोबाईल नंबरवरून तिला त्रास देण्यास सुरुवात केली. त्याच्या सततच्या या कृत्यांमुळे त्रस्त झालेल्या तरुणीने अखेर हडपसर पोलीस ठाण्यात धाव घेऊन तक्रार दाखल केली.
या गंभीर प्रकरणाचा पुढील तपास पोलीस निरीक्षक जगदाळे यांच्या मार्गदर्शनाखाली सुरू आहे. ऑनलाइन पेमेंट करताना आपली संपर्क माहिती अनोळखी व्यक्तीच्या हाती लागू शकते, त्यामुळे नागरिकांनी अधिक सतर्क राहण्याची गरज आहे, हे या घटनेवरून स्पष्ट होते.
