महाराष्ट्र संवाद न्यूज – श्रीरामपूर
श्रीरामपूर येथील अशोक सहकारी साखर कारखान्याला साईकृपा शुगर अँड अलाइड लिमिटेडने दिलेला २० लाख रुपयांचा धनादेश अनादरित झाल्याप्रकरणी श्रीगोंदा मतदारसंघाचे विद्यमान आमदार विक्रम बबनराव पाचपुते यांच्या अडचणीत वाढ झाली आहे. श्रीरामपूर न्यायालयाने या प्रकरणी आमदार पाचपुते यांच्यासह साईकृपा शुगर अँड अलाइड लिमिटेडच्या व्यवस्थापकांनाही पकड वॉरंट बजावले आहे. न्यायालयाच्या या कठोर कारवाईमुळे राजकीय वर्तुळात खळबळ उडाली आहे.
हिरडगाव येथील साईकृपा शुगर अँड अलाइड लिमिटेडचे माजी अध्यक्ष आणि विद्यमान आमदार विक्रम बबनराव पाचपुते आणि कारखान्याचे व्यवस्थापक यांच्याविरुद्ध श्रीरामपूर येथील अशोक सहकारी साखर कारखान्याने २० लाख रुपयांचा धनादेश अनादरित केल्याची तक्रार दाखल केली होती. या तक्रारीच्या अनुषंगाने श्रीरामपूर येथील न्यायदंडाधिकारी (क्रमांक २) यांच्या न्यायालयात सुनावणी सुरू आहे.
न्यायालयाने यापूर्वी श्रीगोंदा पोलिसांना आमदार पाचपुते आणि व्यवस्थापक यांना ताब्यात घेऊन न्यायालयात हजर करण्याचे आदेश दिले होते. मात्र, श्रीगोंदा पोलिसांनी या वॉरंटची अंमलबजावणी न केल्याने आमदार पाचपुते आणि व्यवस्थापक न्यायालयात हजर झाले नाहीत. या दिरंगाईमुळे न्यायालयाने तीव्र नाराजी व्यक्त केली आहे.
दरम्यान, न्यायालयाने आता श्रीगोंदा पोलीस निरीक्षकांना स्पष्ट आणि कठोर आदेश दिले आहेत की, दोन्ही आरोपींना तातडीने ताब्यात घेऊन न्यायालयात हजर करावे. पकड वॉरंटच्या अंमलबजावणीत कोणतीही चूक किंवा हलगर्जीपणा खपवून घेतला जाणार नाही, असे स्पष्ट निर्देश न्यायालयाने दिले आहेत.
धनादेश अनादरसारख्या गंभीर प्रकरणामुळे साईकृपा शुगर अँड अलाइड लिमिटेडच्या आर्थिक विश्वासार्हतेवर मोठे प्रश्नचिन्ह उभे राहिले आहे. अशोक सहकारी साखर कारखान्यासारख्या प्रतिष्ठित संस्थेला दिलेला धनादेश न वटल्याने आश्चर्य व्यक्त केले जात आहे.
आमदार विक्रम पाचपुते यांच्या कायदेशीर अडचणीत यामुळे आणखी वाढ झाली आहे. हिरडगाव येथील साईकृपा शुगर अँड अलाइड लिमिटेड हा साखर कारखाना पूर्वी माजी आमदार बबनराव पाचपुते यांच्या कुटुंबाच्या मालकीचा होता. सध्या या कारखान्याचे नियंत्रण गौरी शुगरचे अध्यक्ष बाबुराव बोत्रे पाटील यांच्याकडे असले तरी, मागील आर्थिक व्यवहारांमुळे पाचपुते कुटुंबाला सातत्याने कायदेशीर समस्यांना तोंड द्यावे लागत आहे. या नवीन घडामोडीमुळे त्यांच्या अडचणींमध्ये आणखी भर पडली आहे. आता पोलीस आमदार पाचपुते यांना कधी ताब्यात घेतात आणि न्यायालयात कधी हजर करतात याकडे सर्वांचे लक्ष लागले आहे.
