संगमनेर – प्रतिनिधी
नाशिक पदवीधर मतदारसंघाचे आमदार सत्यजित तांबे यांनी गुरुवारी (२२ मे) दुपारी साकूर येथील ग्रामीण रुग्णालयाला भेट देऊन तेथील आरोग्य सुविधांची पाहणी केली. सध्या काही अडचणींचा सामना करत असले तरी रुग्णालयातील डॉक्टर्स आणि कर्मचाऱ्यांच्या सेवेची त्यांनी प्रशंसा केली. या रुग्णालयाची स्थापना आपल्या जिल्हा परिषद सदस्यपदाच्या कार्यकाळात झाली असल्याने ही वास्तू आपल्या जिव्हाळ्याचा विषय असल्याचेही तांबे यांनी सांगितले.
रुग्णालयाच्या सद्यस्थितीबद्दल माहिती मिळाल्यानंतर आमदार तांबे यांनी तातडीने रुग्णालयाला भेट दिली. यावेळी त्यांच्यासोबत कारखान्याचे संचालक इंद्रजीत खेमनर यांच्यासह अन्य मान्यवर उपस्थित होते. त्यांनी रुग्णालयाचे वैद्यकीय अधीक्षक डॉ. प्रल्हाद बांबळे आणि कर्मचाऱ्यांशी संवाद साधून अडचणींचा आढावा घेतला. यानंतर संबंधित अधिकाऱ्यांना तातडीने उपाययोजना करण्याचे निर्देशही त्यांनी दिले.
आमदार सत्यजित तांबे यांनी साकूर ग्रामीण रुग्णालयाशी असलेल्या आपल्या भावनिक बांधिलकीचा पुनरुच्चार केला. २०१२ साली जिल्हा परिषद सदस्य असताना या ग्रामीण रुग्णालयाचा प्रस्ताव त्यांनी मंजूर करून घेतला होता. २०१४ मध्ये भूमिपूजन झाले आणि २०१६ मध्ये बांधकाम पूर्ण झाले. साकूरमध्येच हे रुग्णालय व्हावे यासाठी स्थानिक पदाधिकाऱ्यांच्या आग्रहाने विशेष प्रयत्न केले आणि आज या परिसरातील नागरिकांसाठी ही आरोग्य सेवा अत्यंत उपयुक्त ठरत असल्याचे त्यांनी सांगितले.
सध्या या रुग्णालयात दरमहा १० ते १५ प्रसूती होत असून, दररोज सुमारे १२५ रुग्णांची तपासणी केली जाते. सद्यस्थितीत १० ते १५ रुग्ण येथे दाखल (अ‍ॅडमिट) आहेत. या आकडेवारीवरून येथील सेवा किती उपयोगी पडते हे स्पष्ट होते, असेही तांबे यांनी नमूद केले. रुग्णालयाची इमारत चांगल्या प्रकारे कार्यरत असली तरी, काही अडचणी अजूनही असल्याचे आमदार तांबे यांनी मान्य केले. त्यांनी या अडचणी समजून घेतल्या असून, सार्वजनिक बांधकाम विभागाला प्रस्ताव तयार करून आरोग्य विभागाकडे पाठवण्याच्या सूचना दिल्या आहेत. त्यानंतर आपण स्वतः पाठपुरावा करून आवश्यक निधी आणणार असल्याचे त्यांनी सांगितले, जेणेकरून उर्वरित सुविधाही पूर्ण करता येतील.
या छोट्या-छोट्या अडचणी दूर झाल्या पाहिजेत, यासाठी येथील डॉक्टरही आग्रही आहेत. आज सर्वत्र निधीअभावी अडचणी निर्माण होत असल्या तरी साकूर ग्रामीण रुग्णालय हा माझा जिव्हाळ्याचा प्रकल्प आहे. त्यामुळे यासाठी मी कटिबद्ध आहे. येत्या काळात निधी उपलब्ध करून देण्याचा पूर्ण प्रयत्न केला जाईल,” असे आश्वासन आमदार तांबे यांनी दिले. त्यांच्या या पाहणी दौऱ्यामुळे साकूर ग्रामीण रुग्णालयाच्या विकासाला गती मिळण्याची आशा निर्माण झाली आहे.
