सिन्नर, नाशिक:
मान्सूनच्या आगमनासोबतच नाशिक जिल्ह्याला मुसळधार पावसाने झोडपले असून, सिन्नर तालुक्यात पावसाने अक्षरशः हाहाकार माजवला आहे. पावसामुळे राज्यात सर्वोत्कृष्ट व हायटेक गणल्या जात असलेल्या सिन्नरच्या अद्ययावत बसस्थानकाचा काही भाग तुफानी पावसामुळे कोसळल्याची धक्कादायक घटना समोर आली आहे. या दुर्घटनेत एक शिवशाही बस आणि काही इतर वाहने ढिगाऱ्याखाली दबल्याची भीती व्यक्त केली जात आहे.
बसस्थानकातील दुर्घटनेने खळबळ… आज राज्यात मान्सूनचे दमदार आगमन झाले. नाशिक जिल्ह्यातील ग्रामीण भागातही पावसाने जोरदार हजेरी लावली असून, नद्या-नाले दुथडी भरून वाहत आहेत. मात्र, या पावसाचा सर्वाधिक फटका सिन्नर बसस्थानकाला बसला आहे. सिन्नरच्या हायटेक बसस्थानकाचा स्लॅब कोसळल्याने एकच खळबळ उडाली आहे. तातडीने खबरदारीचा उपाय म्हणून संपूर्ण बसस्थानक रिकामे करण्यात आले असून, सर्व प्रवाशांना सुरक्षित बाहेर काढण्यात आले आहे. या घटनेमुळे सिन्नर शहरातील सर्व रस्ते ठप्प झाले असून, वाहतूक विस्कळीत झाली आहे. पावसामुळे ही दुर्घटना घडल्याचे प्राथमिक अंदाज आहे, परंतु नेमका भाग कशामुळे कोसळला, हे अद्याप स्पष्ट झालेले नाही.
विशेष म्हणजे, हे बसस्थानक सिन्नरचे आमदार आणि राज्याचे कृषीमंत्री माणिकराव कोकाटे यांच्या निधीतून उभारण्यात आलेले आहे. त्यामुळे या दुर्घटनेमागे बांधकामाचा दर्जा, किंवा इतर काही कारणे आहेत का, याची चर्चा आता राजकीय वर्तुळातही सुरू झाली आहे.
