संगमनेर, प्रतिनिधी –
अमृतवाहिनी शेती व शिक्षण विकास संस्थेच्या अमृतवाहिनी एम.बी.ए. महाविद्यालयातील प्रतिभावान विद्यार्थी प्रज्वल दीपक साळुंके याची कॅरिबियन बेटांवरील सेंट किट्स अँड नेव्हिस येथे एका आंतरराष्ट्रीय कंपनीमध्ये तब्बल $180,000 (सुमारे ₹15 लाख) वार्षिक पॅकेजवर नोकरीसाठी निवड झाली आहे. प्रज्वलने आपले उत्कृष्ट शैक्षणिक प्रदर्शन, प्रभावी नेतृत्वगुण आणि व्यावसायिक कौशल्याच्या बळावर ही महत्त्वपूर्ण संधी प्राप्त केली आहे.
या यशाबद्दल बोलताना प्रज्वलने आपले श्रेय अमृतवाहिनी एम.बी.ए. महाविद्यालयाला दिले. तो म्हणाला, अमृतवाहिनी एम.बी.ए. मध्ये विद्यार्थ्यांचा केवळ शैक्षणिकच नव्हे, तर त्यांच्या व्यक्तिमत्त्वाचा सर्वांगीण विकास केला जातो. महाविद्यालयात नियमितपणे विविध क्षेत्रांतील तज्ञांचे मार्गदर्शन, आंतरराष्ट्रीय चर्चासत्रे, मॉक इंटरव्ह्यू यांसारखे अनेक उपक्रम राबवले जातात, ज्यामुळे विद्यार्थ्यांना जागतिक स्तरावर स्पर्धा करण्यासाठी तयार केले जाते.
अमृत ट्रॉफीसारख्या स्पर्धांमुळे विद्यार्थ्यांचे इंग्रजीवरील प्रभुत्व, बिझनेस क्विझ, बिझनेस स्किल्स, मॅनेजमेंट विषयावरील ॲड शो, सिनेमा ॲट्रोग्राफी आणि डेटा ॲनालिटिक्ससारख्या अनेक उपक्रमांमुळे विद्यार्थ्यांमध्ये समन्वय आणि नेतृत्व कौशल्ये विकसित होतात. या सर्व गोष्टींमुळेच व्यावसायिक दृष्टिकोन असलेले विद्यार्थी घडतात.
प्रज्वल हा संगमनेर मधील चहा विक्रेते व शिवसैनिक दीपक साळुंके यांचा मुलगा असून त्याच्या या नेत्रदीपक यशाबद्दल त्याचा संस्थेच्या वतीने सत्कार करून त्याला पुढील कामासाठी शुभेच्छा देण्यात आल्या. त्याचे माजी मंत्री बाळासाहेब थोरात, संस्थेचे विश्वस्त माजी आमदार डॉ. सुधीर तांबे, संस्थेच्या कार्यकारी विश्वस्त शरयू देशमुख, इंद्रजित थोरात, डॉ. जयश्री थोरात, संस्थेचे मुख्य कार्यकारी अधिकारी अनिल बी. शिंदे, मॅनेजर प्रा. व्ही. बी. धुमाळ, शैक्षणिक संचालक डॉ. जे. बी. गुरव, महाविद्यालयाचे संचालक डॉ. बी. एम. लोंढे आणि अमृतवाहिनी एम.बी.ए. महाविद्यालयातील सर्व कर्मचाऱ्यांनी अभिनंदन केले आहे.
