अहिल्यानगर, १७ जून –
अहिल्यानगर स्थानिक गुन्हे शाखेने मोठी कारवाई करत दरोडा टाकणाऱ्या एका आंतरजिल्हा टोळीला जेरबंद केले आहे. या कारवाईमुळे अहिल्यानगर जिल्ह्यातील विळद येथील दरोड्याबरोबरच छत्रपती संभाजीनगर जिल्ह्यातील गुन्हेही उघडकीस आले आहेत. पोलिसांनी ५ आरोपींना अटक केली असून त्यांच्याकडून ३ लाख ४ हजार रुपये किमतीचा मुद्देमाल जप्त करण्यात आला आहे.
भैय्या कडू काळे (वय १८, रा. शिरोडी, ता. गंगापूर, जि. छत्रपती संभाजीनगर), ताराचंद विरूपन भोसले (वय ३५, रा. गाजगाव, ता. गंगापूर, जि. छत्रपती संभाजीनगर), किसन उर्फ विजय गौतम काळे (वय २३, रा. पानसवाडी, ता. नेवासा, जि. अहिल्यानगर), नागेश विरूपन भोसले (वय २०, रा. गाजगाव, ता. गंगापूर, जि. छत्रपती संभाजीनगर), सोनुल लक्षरी भोसले (वय १९, रा. बिडकीन, ता. पैठण, जि. छत्रपती संभाजीनगर) अशी अटक करण्यात आलेल्या आरोपींची नावे आहेत.
आरोपींनी चौकशीदरम्यान आपले साथीदार बदाम कडू काळे, रघुवीर विरूपन भोसले आणि महेश नंदू काळे (सर्व फरार) यांच्यासोबत अहिल्यानगर जिल्ह्यातील विळद गावातील डोंगरमाथ्यावर मेंढपाळाच्या पालावर ५-६ दिवसांपूर्वी महिला व पुरुषांना मारहाण करून चोरी केल्याची कबुली दिली. पोलिसांनी या आरोपींकडून १२ ग्रॅम वजनाचे सोन्याचे दागिने, चार मोबाईल आणि दोन मोटारसायकली असा एकूण ३ लाख ४ हजार रुपये किमतीचा मुद्देमाल जप्त केला आहे. पकडलेल्या आरोपीकडून आणखी काही गुन्हे उघडते सेनेचे शक्यता व्यक्त करण्यात आली आहे.
काय होती नेमकी घटना… ९ जून २०२५ रोजी पिंपरी घुमट, विळद (ता. अहिल्यानगर) येथील मेंढपाळ पोपट बन्सी होडगर (वय ३५) हे आपल्या कुटुंबासह शेतात झोपले असताना अज्ञात ६ ते ७ दरोडेखोरांनी त्यांच्यावर लाकडी दांडक्याने हल्ला केला. चाकूचा धाक दाखवून त्यांनी होडगर यांच्या पत्नीचे दागिने जबरदस्तीने चोरून नेले. या प्रकरणी एमआयडीसी पोलीस ठाण्यात गुन्हा (गु.र.नं. ४४७/२०२५, बीएनएस कलम ३१० (२), ३११) दाखल करण्यात आला होता.
या घटनेची माहिती मिळताच पोलीस अधीक्षक सोमनाथ घार्गे यांनी तात्काळ दखल घेतली. त्यांनी स्थानिक गुन्हे शाखेचे पोलीस निरीक्षक दिनेश आहेर यांना या गुन्ह्याचा समांतर तपास करण्याचे आदेश दिले. आहेर यांनी उपनिरीक्षक तुषार धाकराव यांच्या नेतृत्वाखाली दत्तात्रय हिंगडे, बिरप्पा करमल, गणेश धोत्रे, अरुण गांगुर्डे, भगवान धुळे, गणेश लोंढे, शाहीद शेख, फुरकान शेख, बाळासाहेब नागरगोजे, सोमनाथ झांबरे, रवींद्र घुंगासे, आकाश काळे, भगवान थोरात, भाऊसाहेब काळे, सुनील मालणकर, रमीजराजा आत्तार, अमोल कोतकर, अमृत आढाव, प्रशांत राठोड, मेघराज कोल्हे, चंद्रकांत कुसळकर आणि अरुण मोरे यांचा समावेश असलेले विशेष पथक तयार केले. आरोपींचा शोध घेण्यासाठी पथके तात्काळ रवाना करण्यात आली.
१५ जून २०२५ रोजी हे पथक एमआयडीसी पोलीस ठाण्याच्या हद्दीत गोपनीय माहिती आणि तांत्रिक विश्लेषणाच्या आधारे आरोपींचा शोध घेत होते. त्यावेळी मिळालेल्या माहितीनुसार, किसन उर्फ विजय गौतम काळे (रा. पानसवाडी, ता. नेवासा, जि. अहिल्यानगर) याने आपल्या साथीदारांसह हा गुन्हा केला असून, चोरीचे सोने विकण्यासाठी ते मोटारसायकलवरून नेवासा मार्गे अहिल्यानगर येथील पांढरीपूल येथे येणार होते. या माहितीच्या आधारे पोलिसांनी सापळा रचला होता.
