निवृत्तीनाथ महाराजांच्या पालखीचे संगमनेरमध्ये उत्साहात स्वागत, आमदार खताळ आणि अपर जिल्हाधिकारी कोळेकरांनी केले स्वागत

संगमनेर, प्रतिनिधी –
“ज्ञानोबा माऊली तुकाराम” च्या गजरात संतश्रेष्ठ निवृत्तीनाथ महाराजांच्या त्र्यंबकेश्वरहून पंढरपूरकडे निघालेल्या पायी दिंडीचे संगमनेर तालुक्यात सोमवारी संध्याकाळी उत्साहात स्वागत करण्यात आले. नाशिक जिल्ह्यातून अहिल्यानगर जिल्ह्यातील पारेगाव बुद्रुक येथील अश्विनाथ महाराज गडावर पालखी पोहोचताच, संगमनेरचे आमदार अमोल खताळ आणि प्रशासनाच्या वतीने शिर्डीचे अपर जिल्हाधिकारी बाळासाहेब कोळेकर यांनी भक्तिमय वातावरणात पालखीचे पुष्पहार अर्पण करून स्वागत केले.
पारेगाव ग्रामस्थांनी पालखीवर जेसीबीतून पुष्पवृष्टी केली. आमदार अमोल खताळ यांनी स्वतः पालखीतील बैलजोडीचा दोर धरून भक्तिभाव व्यक्त केला. त्यांनी गळ्यात वीणा घातला होता, तर त्यांच्या पत्नी नीलम डोईवर तुळशी वृंदावन घेऊन “विठ्ठल-नाम” च्या जयघोषात पायी चालत सहभागी झाल्या होत्या.
यावेळी, निवृत्तीनाथ महाराज पालखी सोहळ्याचे प्रमुख ॲड. सोमनाथ घोटेकर यांच्या हस्ते आमदार अमोल खताळ आणि नीलम खताळ यांचा गुलाबपुष्प, श्रीफळ, संत निवृत्ती महाराज प्रतिमा आणि ज्ञानेश्वरी देऊन सन्मान करण्यात आला.
या प्रसंगी आमदार अमोल खताळ यांच्यासोबत शिर्डीचे अपर जिल्हाधिकारी बाळासाहेब कोळेकर, श्रीरामपूर विभागाचे अपर पोलीस अधीक्षक वैभव कलबुर्मे, संगमनेर उपविभागाचे प्रांताधिकारी अरुण उंडे, पोलीस उपाधीक्षक डॉ. कुणाल सोनवणे, तहसीलदार धीरज मांजरे, गटविकास अधिकारी राजेंद्र ठाकूर, पोलीस निरीक्षक देविदास ढुमणे, तालुका आरोग्याधिकारी डॉ. सुरेश घोलप तसेच भाजप नेते भीमराज चत्तर, विठ्ठल घोरपडे, शिवसेना तालुकाध्यक्ष रामभाऊ राहणे, सरपंच संदीप देशमुख, साहेबराव घुगे, रावसाहेब गडाख, सुरेश दळवी, किशोर गडाख, गणेश गडाख, भाऊपाटील गडाख, अमोल दिघे, दत्तात्रय दिघे, गणेश संपत फड यांच्यासह महायुतीचे कार्यकर्ते, पारेगाव ग्रामस्थ, अधिकारी आणि कर्मचारी मोठ्या संख्येने उपस्थित होते.

वारकऱ्यांसाठी अडीच कोटींचा निधी…
मागील वर्षी वारकऱ्यांना आलेल्या अडचणी लक्षात घेता, या वर्षी पालकमंत्री राधाकृष्ण विखे पाटील यांच्याकडे जिल्हा नियोजनच्या बैठकीत निधीची मागणी करण्यात आली होती. त्यानुसार, राज्य शासनाकडून जिल्हा नियोजन समितीमार्फत अडीच कोटी रुपयांचा निधी मंजूर करण्यात आला. या निधीतून वारकऱ्यांसाठी आरोग्य, निवास आणि इतर आवश्यक सोयीसुविधा उपलब्ध करून देण्यात आल्या आहेत. पालखी प्रमुखांनीही शासनाच्या या प्रयत्नांबद्दल समाधान व्यक्त केले. – अमोल खताळ, आमदार.