अहिल्यानगर, १८ जून २०२५:
पाथर्डी (अहिल्यानगर) येथील शिवनेरी मिसळच्या हॉटेल चालकाकडून मासिक हप्ता म्हणून १५०० रुपयांची लाच स्वीकारताना मंगळवारी नाशिक लाचलुचपत प्रतिबंधक विभागाने (एसीबी) पाथर्डी पोलीस स्टेशनमधील पोलीस हवालदार लक्ष्मण सुखदेव पोटे (वय ३५) यांना रंगेहाथ पकडले. या प्रकरणी पोलीस नाईक रामदास जयराम सोनवणे आणि पोलीस कोठडीतील आरोपी राहुल शिवाजी साबळे (वय २२) यांच्यावरही गुन्हा दाखल करण्यात आला आहे.
मिळालेल्या माहितीनुसार, तक्रारदार यांचे पाथर्डी येथे ‘शिवनेरी मिसळ’ नावाचे हॉटेल असून, ते रात्री १० नंतरही सुरू असते. यावरून कारवाई न करण्यासाठी पोलीस हवालदार लक्ष्मण पोटे यांनी तक्रारदाराकडे मासिक २००० रुपये हप्त्याची मागणी केली होती. याबाबत तक्रारदाराने १५ जून २०२५ रोजी नाशिक एसीबीकडे तक्रार केली. एसीबीने पडताळणी केली असता, लक्ष्मण पोटे यांनी तडजोड करून १५०० रुपये लाच स्वीकारण्यास सहमती दर्शविल्याचे समोर आले.
त्यामुळे १७ जून २०२५ रोजी सापळा रचण्यात आला. लक्ष्मण पोटे यांनी तक्रारदाराला पाथर्डी उपजिल्हा रुग्णालयात बोलावले होते, जिथे ते पोस्को कायद्यांतर्गत दाखल असलेल्या गुन्ह्यातील पोलीस कोठडीतील आरोपी राहुल शिवाजी साबळे याच्या वैद्यकीय तपासणीसाठी आले होते. तिथेच त्यांनी तक्रारदाराला लाचेची रक्कम राहुल साबळे याच्याकडे देण्यास सांगितले. राहुल साबळे याने लाचेची रक्कम असल्याचे माहीत असूनही ती स्वीकारली.
लाचेची रक्कम घेऊन राहुल साबळे आणि लक्ष्मण पोटे हे दुचाकीवरून पोलीस ठाण्याकडे येत असताना, रस्त्यात एका चहाच्या टपरीवर त्यांनी ती रक्कम पोलीस नाईक रामदास जयराम सोनवणे यांच्याकडे दिली. रामदास सोनवणे हे लाचेच्या रकमेसह पळून गेले आणि त्यांनी पुरावा नष्ट करण्याचा प्रयत्न केला.
या प्रकरणी पाथर्डी पोलीस स्टेशनमध्ये गुन्हा दाखल करण्यात आला आहे. एसीबीने लक्ष्मण पोटे यांना ताब्यात घेतले असून, त्यांचा मोबाईल फोन आणि राहुल साबळे यांचे कपडे जप्त केले आहेत. तसेच, पुढील तपास सुरू आहे.
