संगमनेरमध्ये सेवानिवृत्त व्यक्तीला ‘CID’ असल्याचे भासवून लुटले; 65 हजारांची सोन्याची चैन लंपास

संगमनेर, प्रतिनिधी

आत्ताच आम्ही सात लाखाची चोरी पकडली असून तुमच्यावर आमचा संशय आहे, असे सांगत सेवानिवृत्त व्यक्तीला तिघांनी सीआयडी अधिकारी असल्याचे सांगून लुटण्यात आले. बनावट सीआयडी अधिकाऱ्यांनी या व्यक्तीकडील 65 हजार रुपये किमतीची सोन्याची चैन लंपास करण्याची घटना संगमनेर तालुका पोलीस ठाण्याच्या हद्दीत नाशिक-पुणे महामार्गावर चौधरी ढाब्याजवळ घडली आहे.

14 जून 2025 रोजी सकाळी अकरा ते पावणे बारा वाजण्याच्या दरम्यान ही घटना घडली असल्याचे समोर आले आहे. याप्रकरणी संगमनेर तालुका पोलीस ठाण्यात भारतीय न्याय संहिता 2023 च्या कलम 303(2) आणि 3(5) अंतर्गत गुन्हा ( No. 0391/2025) दाखल करण्यात आला आहे.

मिळालेल्या माहितीनुसार, धार्मिक विधीसाठी गेलेले केशव नाथा गोसावी (वय 69, रा. सावित्रीबाई फुले चौक, गल्ली नं. 02 बटवाल मळा, ता. संगमनेर, जि. अहिल्यानगर) हे 14 जून रोजी सकाळी साडेदहा वाजता त्यांच्या प्लॅटिना मोटारसायकलवरून (MH 17 DF 8035) चंदनापुरी घाटातून पुणे-नाशिक हायवे रोडने येत असताना, चौधरी ढाब्याजवळ त्यांना तीन मोटारसायकलवरील अनोळखी इसमांनी थांबवले.

त्यापैकी एका इसमाने स्वतःला सीआयडी अधिकारी असल्याचे सांगत, “आत्ताच आम्ही सात लाखांची चोरी पकडली आहे, तुमच्यावर आमचा संशय आहे,” असे धमकावले.

त्यांनी गोसावी यांना मोटारसायकलची डिक्की उघडून दाखवण्यास सांगितले आणि त्यांच्या गळ्यातील सोन्याची चैन काढण्यास सांगितले, सोने गळ्यात घालून जायचे नाही असे ते म्हणाले. घाबरलेल्या गोसावी यांनी खिशातून रुमाल काढला. यावेळी आरोपींनी त्यांच्या खिशातील तंबाखूची पुडी, पाकीट आणि सोन्याची चैन रुमालात बांधली. त्यानंतर आरोपींनी रुमालातील वस्तू डिक्कीत ठेवण्यास सांगितले आणि गोसावी यांचे लक्ष विचलित करून सोन्याची चैन चोरून नेली. आरोपींनी गोसावी यांना “येथे थांबू नका” असे सांगून ते संगमनेर रोडने निघून गेले.

गोसावी पावणे बारा वाजता घरी पोहोचल्यानंतर त्यांनी डिक्कीतील रुमाल उघडला असता, त्यात इतर वस्तू होत्या; परंतु सोन्याची चैन नव्हती. गोसावी यांनी तात्काळ ही बाब घरच्यांना सांगितली. सीआयडी अधिकारी असल्याचे भासविणाऱ्यांनी “ओम” चे पेडल असलेली, अंदाजे साडेतीन तोळे वजनाची आणि 65,000 रुपये किमतीची सोन्याची साखळी लंपास केल्याचे त्यांच्या लक्षात आले.

या संदर्भात संगमनेर तालुका पोलीस ठाण्यात गोसावी यांच्या तक्रारीवरून अज्ञात आरोपी विरुद्ध गुन्हा दाखल करण्यात आला असून पोलीस शिपाई आशिष कुंडलिक आरवाडे पुढील तपास करत आहे.