गुरुवार १९ जून, – अकोले:
मुळा नदीच्या पाणलोट क्षेत्रात मान्सून सक्रिय झाल्यामुळे अकोले तालुक्यात उत्साहाचं वातावरण आहे. तालुक्यात मंगळवारपासून पावसाने जोरदार हजेरी लावली असून, बुधवारी रात्रभर झालेल्या संततधार पावसामुळे मुळा नदी दुथडी भरून वाहत आहे. यामुळे, आंबीत धरणानंतर आता मुळा नदीवरील पिंपळगाव खांड धरण आज (गुरुवारी) पहाटे साडेपाच वाजता पूर्ण क्षमतेने भरून ओसंडून वाहू लागले आहे.
पिंपळगाव खांड धरणातून पाण्याचा प्रवाह आता मुळा धरणाकडे वेगाने झेपावला आहे. मुळा नदीच्या पाणलोट क्षेत्रात गेल्या काही दिवसांपासून पावसाची दमदार बॅटिंग सुरू आहे. या जोरदार पावसामुळे मुळा नदीची पाणी पातळी मोठ्या प्रमाणात वाढली आहे. ६०० दशलक्ष घनफूट (दलघफू) क्षमतेचे पिंपळगाव खांड धरण पूर्ण भरल्याने परिसरातील शेतकरी आणि ग्रामस्थांमध्ये समाधानाचे वातावरण आहे.
या वर्षीच्या पावसाळ्यात भरलेले हे अकोले तालुक्यातील दुसरे धरण आहे. यापूर्वी, मुळा नदीच्या उगमावर असलेले १९३ दशलक्ष घनफूट क्षमतेचे आंबीत धरण २७ मे २०२५ रोजी दुपारी १ वाजता ओव्हरफ्लो झाले होते. जिल्ह्यामध्ये सर्वात प्रथम भरलेले हेच धरण होते. आता पिंपळगाव खांड धरण भरल्याने मुळा नदीच्या पाण्याची पातळी आणखी वाढली आहे.
मान्सूनच्या या दमदार बॅटिंगमुळे अकोले तालुक्यातील सह्याद्रीच्या डोंगररांगा आता पूर्णपणे ओल्याचिंब झाल्या आहेत. यामुळे आता पर्यटकांचीही तालुक्यात गर्दी होण्याची चिन्हे आहेत. ओढे-नाले सक्रिय झाल्याने मुळा नदीचा प्रवाह आणखी वाढला आहे, यामुळे पिंपळगाव खांड धरणात पाण्याची मोठी आवक झाली. आजही पावसाचे सातत्य टिकून असल्यामुळे मुळा नदीचा प्रवाह असाच कायम राहण्याची शक्यता आहे.
सध्या पिंपळगाव खांड धरणातून वेगाने पाणी मुळा धरणाकडे सोडले जात आहे. यामुळे, मुळा नदीवर राहुरी तालुक्यात असलेल्या २६ टीएमसी (दशलक्ष घनमीटर) क्षमतेच्या मुळा धरणात आता पाण्याची आवक सुरू होणार आहे, त्यामुळे मुळा धरणाची पाणी पातळी वाढण्यास मदत होईल.
अकोले तालुक्यातील आंबीत धरणापाठोपाठ पिंपळगाव खांड धरण भरल्याने यंदाच्या पावसाळ्यात तालुक्यातील हे दुसरे धरण पूर्ण क्षमतेने भरले आहे. मुळा नदी पुन्हा वाहती झाल्यामुळे संगमनेर आणि अकोले तालुक्यातील मुळा नदीच्या लाभक्षेत्रात आनंद व्यक्त होत आहे.
