शुक्रवार 20 जून:
मुख्यमंत्री देवेंद्र फडणवीस यांच्या ताफ्यात घुसून एका व्यक्तीने आत्मदहनाचा प्रयत्न केल्याने एकच खळबळ उडाली आहे. जळगावच्या आकाशवाणी चौक परिसरात दुपारी घडलेल्या या घटनेमुळे शहरात काही काळ तणावाचे वातावरण निर्माण झाले होते. पोलिसांनी तात्काळ हस्तक्षेप केल्याने मोठा अनर्थ टळला असून, आत्मदहनाचा प्रयत्न करणाऱ्या व्यक्तीला ताब्यात घेण्यात आले आहे.
मिळालेल्या माहितीनुसार, संजय वराडे (रा. जळगाव) असे या व्यक्तीचे नाव आहे, तो एक ठेकेदार आहे. मुख्यमंत्री देवेंद्र फडणवीस हे आज जळगाव जिल्ह्याच्या दौऱ्यावर होते. त्यांचा ताफा आकाशवाणी चौकातून जात असताना, वराडे यांनी अचानक ताफ्यासमोर येत स्वतःच्या अंगावर रॉकेल ओतून पेटवून घेण्याचा प्रयत्न केला. मात्र, मुख्यमंत्र्यांच्या सुरक्षेसाठी तैनात असलेल्या पोलिसांनी प्रसंगावधान राखत तात्काळ वराडे यांना पकडले आणि पुढील अनर्थ टाळला.
संजय वराडे यांनी आत्मदहनाचा प्रयत्न का केला, याबाबतची माहिती आता समोर आली आहे. शासनाकडून त्यांना मिळणे असलेले पैसे अद्याप मिळालेले नाहीत, यामुळे ते संतप्त होते. आपल्या मागण्यांकडे शासनाचे लक्ष वेधण्यासाठी त्यांनी हे पाऊल उचलल्याचे बोलले जात आहे.
या घटनेमुळे जळगाव शहरात एकच चर्चा सुरू झाली आहे. मुख्यमंत्र्यांच्या दौऱ्यादरम्यानच ही घटना घडल्याने प्रशासनातही खळबळ उडाली आहे. पोलिसांनी तातडीने परिस्थिती नियंत्रणात आणली असून, शहरात ठिकठिकाणी पोलिसांचा कडक बंदोबस्त तैनात करण्यात आला आहे. ताब्यात घेण्यात आलेल्या संजय वराडे यांची पोलीस अधिक चौकशी करत आहेत. या घटनेमुळे शासनाच्या धोरणांविरोधात असलेला कंत्राटदारांचा असंतोष पुन्हा एकदा समोर आला आहे.
