संगमनेर, २३ जून – प्रतिनिधी:
अहिल्यानगरचे जिल्हा पोलीस अधीक्षक सोमनाथ घार्गे यांनी जिल्ह्यातील अवैध धंदे समूळ नष्ट करण्याचे आदेश दिल्यानंतर, संगमनेर शहर पोलिसांनी प्रवरा नदीकिनारी संगमनेर खुर्द गावच्या शिवारात सुरु असलेल्या एका मोठ्या जुगार अड्ड्यावर छापा टाकत १० जणांविरुद्ध महाराष्ट्र जुगार प्रतिबंधक कायद्यांतर्गत गुन्हा दाखल केला आहे. या कारवाईत रोख रक्कम, मोटारसायकली, मोबाईल फोन आणि जुगाराचे साहित्य असा एकूण ५,११,२००/- रुपयांचा मुद्देमाल जप्त करण्यात आला आहे.
गेल्या काही दिवसांपासून संगमनेरमध्ये अवैध धंद्यांची चर्चा सुरू होती. विशेषतः, जिल्हा पोलीस अधीक्षकांच्या पथकाने दोन दिवसांपूर्वीच संगमनेरमधील दोन मोठ्या मटका चालकांवर कारवाई केली होती. असे असतानाही, शहरात अवैध धंदे सर्रासपणे सुरू असल्याने, पोलिसांच्या कार्यक्षमतेवर प्रश्नचिन्ह निर्माण झाले होते. अखेर, संगमनेर खुर्द मधील या बहुचर्चित जुगार अड्ड्यावर कारवाई झाल्याने नागरिकांमधून समाधान व्यक्त होत असले तरी शहरात जुगार अड्ड्यांसह सुरू असलेल्या अवैध धंद्यांकडे जिल्हा पोलिसांचे विशेष पथक काय कारवाई करते याकडे लक्ष लागले आहे.
पोलीस हवालदार आत्माराम दत्तात्रय पवार यांनी दिलेल्या फिर्यादीनुसार, रविवारी, (२२ जून) सायंकाळी सव्वा सहा वाजण्याच्या सुमारास संगमनेर खुर्द येथे सुरू असलेल्या एका पत्र्याच्या शेडमध्ये चालणाऱ्या ‘तिरट’ नावाच्या जुगार अड्ड्यावर संगमनेर पोलिसांनी छापा टाकला.
या छाप्यात पोलिसांनी २८,२००/- रुपये रोख रक्कम, ३,६५,०००/- रुपये किमतीच्या सहा दुचाकी, १,१८,०००/- रुपये किमतीचे नऊ मोबाईल फोन, आणि जुगाराचे साहित्य असा एकूण ५,११,२००/- रुपयांचा मुद्देमाल जप्त केला. पोलिसांनी जुगार खेळणाऱ्या आणि खेळवणाऱ्या १० जणांविरुद्ध गुन्हा दाखल केला आहे.
या प्रकरणी पोलिसांनी अनिल एकनाथ राक्षे (वय ४९, रा. संगमनेर खुर्द), शिवाजी छबु चव्हाण (वय ४२, रा. अकोले नाका, संगमनेर), शाम दामोधर बेल्हेकर (वय ४०, रा. साईमंदिराजवळ, संगमनेर), वाहीद अजिज पठाण (वय ३७, रा. सय्यद बाबा चौक, संगमनेर), राजेंद्र तुकाराम जोर्वेकर (वय ५२, रा. एकता नगर, घुलेवाडी), सुरज प्रताप कतारी (वय ३४, रा. कतारगल्ली, संगमनेर), संपत रमेश पवार (वय ४५, रा. संजय गांधीनगर, संगमनेर), तुळशीराम दादा वाळुंज (वय ६५, रा. कोल्हेवाडी), अक्षय पंढरीनाथ वाघमारे (वय २५, रा. संगमनेर), आणि अक्षय उर्फ मोबी कतारी (रा. कतारगल्ली, संगमनेर) या आरोपींना ताब्यात घेतले. हे सर्व आरोपी स्वतःच्या फायद्यासाठी तिरट नावाचा पत्त्यांचा जुगार खेळताना आणि खेळवताना आढळून आल्याचे फिर्यादीत नमूद केले आहे.
या गुन्ह्याचा पुढील तपास पोलीस उपनिरीक्षक समीर अभंग करत आहेत. जिल्हा पोलीस अधीक्षकांनी दिलेल्या आदेशांनंतर अवैध धंद्यांवर होणाऱ्या या कारवाईमुळे संगमनेरमधील गुन्हेगारीवर नियंत्रण मिळवता येईल का, हे पाहणे महत्त्वाचे ठरणार आहे.
