अहिल्यानगर:
छत्रपती संभाजीनगर येथील प्रादेशिक परिवहन कार्यालयात (RTO) लाचखोरीचा प्रकार उघडकीस आला आहे. अहिल्यानगरच्या लाचलुचपत प्रतिबंधक विभागाने (ACB) केलेल्या कारवाईत एका खाजगी एजंटसह एका मोटार वाहन निरीक्षक एसीबीच्या जाळ्यात अडकला आहे. तक्रारदाराकडून ओव्हरलोड कारवाई टाळण्यासाठी १८,००० रुपयांची लाच स्वीकारताना ही कारवाई करण्यात आली.
३३ वर्षीय तक्रारदार यांचा ट्रान्सपोर्टचा व्यवसाय आहे. त्यांच्याकडे आयशर कंपनीचे सहा चाकी वाहन असून, ते जालना ते मुंबई तुरीची डाळ आणि इतर कडधान्याची वाहतूक करतात. त्यांचे वाहन छत्रपती संभाजीनगरच्या हद्दीतून विनाअडथळा चालू देण्यासाठी आणि त्यांच्या वाहनावर ओव्हरलोडची कारवाई न करण्यासाठी छत्रपती संभाजीनगर येथील प्रादेशिक परिवहन कार्यालय (RTO) येथील खाजगी एजंट संदीप रामदास ढोले (वय ४२) यांनी २०,००० रुपये लाचेची मागणी केली होती.
लाचेची ही रक्कम राजू मुरलीधर नागरे (वय ३९, मोटार वाहन निरीक्षक, वर्ग-२) यांच्यासाठी मागण्यात आली होती. वाटाघाटीनंतर लाचेची रक्कम १८,००० रुपयांवर निश्चित करण्यात आली.
तक्रारदाराने या प्रकरणी लाचलुचपत प्रतिबंधक विभाग, अहिल्यानगर येथे तक्रार दाखल केली. एसीबीने २३ जून २०२५ रोजी लाचेच्या मागणीची पडताळणी केली. यात आरोपी संदीप ढोले यांनी राजू नागरे यांच्यासाठी लाचेची मागणी केल्याचे आणि नागरे यांनी ढोले यांना यासाठी मदत केल्याचे निष्पन्न झाले.
त्यानंतर, २४ जून २०२५ रोजी सापळा रचण्यात आला. या कारवाईदरम्यान आरोपी संदीप रामदास ढोले यांनी तक्रारदाराकडून १८,००० रुपये लाच स्वीकारली. मोटार वाहन निरीक्षक राजू मुरलीधर नागरे यांनी लाच स्वीकारण्यासाठी संदीप ढोले यांना प्रोत्साहन दिल्याचेही तपासात समोर आले आहे. लाचेची रक्कम तात्काळ हस्तगत करण्यात आली आहे. या प्रकरणी दोन्ही आरोपींविरुद्ध छत्रपती संभाजीनगर येथील वेदांतनगर पोलीस स्टेशनमध्ये गुन्हा दाखल करण्यात आला आहे.
पोलीस निरीक्षक राजू आल्हाट यांच्या पथकाने ही कारवाई केली. या पथकात पोलीस हवालदार राधा खेमनर, पोलीस कॉन्स्टेबल रविंद्र निमसे, पोलीस नाईक चंद्रकांत काळे आणि चालक पोलीस हवालदार हारून शेख यांचा समावेश होता.
