संगमनेरच्या साई मंदिरात गुरुपौर्णिमेनिमित्त श्री साई सच्चरित्र पारायणाचे आयोजन

संगमनेर, प्रतिनिधी: 

शहरातील प्रवरा नदीकाठी असलेल्या श्री साई मंदिरात गुरुपौर्णिमेनिमित्त श्री साई सच्चरित्र पारायणाचे आयोजन करण्यात आले आहे. ३ जुलै ते १० जुलै या कालावधीत हा सामुदायिक अखंड पारायण सोहळा होणार आहे.

दरवर्षीप्रमाणे यंदाही हे पारायण आयोजित करण्यात आले आहे. या सोहळ्याची सुरुवात ३ जुलै रोजी सकाळी ७ वाजता सामूहिक संकल्पाने होईल. या पारायणात सहभागी होऊ इच्छिणाऱ्या सर्व भाविकांना संकल्प सोडण्यासाठी श्री साई मंदिराच्या पारायण हॉलमध्ये उपस्थित राहण्याचे आवाहन करण्यात आले आहे.

हा पारायण सोहळा आठ दिवस चालेल. भाविक आपल्या सोयीनुसार पहाटे ५:३० ते रात्री १० या वेळेत श्री साई सच्चरित्र ग्रंथाचे वाचन करू शकतात. पारायणाची सांगता १० जुलै रोजी गुरुपौर्णिमेच्या दिवशी होईल. या दिवशी पारायण पूर्ण करणाऱ्या सर्व भाविकांसाठी सामूहिक सत्यनारायण पूजेचे आयोजन करण्यात आले आहे. पारायण पूर्ण करणाऱ्या प्रत्येक भाविकाला प्रसाद म्हणून श्री साई सच्चरित्र ग्रंथ आणि साईबाबांची प्रतिमा भेट दिली जाणार आहे.

तरी या श्री साई सच्चरित्र पारायण सोहळ्यात सहभागी होण्यासाठी इच्छुक असलेल्या साई भक्तांनी आपली नावे मंदिरात नोंदवावीत, असे आवाहन व्यवस्थापक मंडळाने केले आहे.