संगमनेर, प्रतिनिधी:
नाशिक येथील एका ट्रॅव्हल कंपनीला दुबईच्या टूरसाठी बनावट विमान तिकिटे देऊन तब्बल १० लाख रुपयांची फसवणूक केल्याचा धक्कादायक प्रकार समोर आला आहे. या प्रकरणी संगमनेर येथील ‘माईल्सस्टोन हॉलिडेज’ या ट्रॅव्हल एजन्सीचे संचालक संशयित आरोपी असून, त्यांच्याविरुद्ध नाशिक शहर सायबर पोलिस ठाण्यात गुन्हा दाखल करण्यात आला आहे. यामुळे संगमनेरसह नाशिकमध्येही एकच खळबळ उडाली आहे.
मिळालेल्या माहितीनुसार, नाशिकच्या एका कंपनीने त्यांच्या ५० प्रवाशांसाठी दुबईच्या प्रवासाचे तिकीट काढण्यासाठी संगमनेरच्या ‘माईल्सस्टोन हॉलिडेज’ या कंपनीला १० लाख ८२ हजार ५०० रुपये दिले होते. मात्र, संगमनेरच्या या कंपनीने प्रवाशांना बनावट विमान तिकिटे देऊन त्यांची फसवणूक केली. प्रवाशांना मुंबई विमानतळावर प्रवेश नाकारण्यात आल्यानंतर हा प्रकार उघडकीस आला. काही प्रवाशांना अस्तित्वात नसलेल्या पीएनआर क्रमांकाची बनावट तिकिटे देण्यात आली होती, तर काही तिकिटे काढल्यानंतर ती लगेच रद्द करण्यात आली. यामुळे नाशिकच्या कंपनीला आपली दुबई टूर तात्काळ रद्द करावी लागली.
या फसवणुकीमुळे नाशिकच्या कंपनीचे मोठे आर्थिक नुकसान झाले. त्यांना प्रवाशांना परतावा द्यावा लागला, तसेच टूरच्या आयोजनासाठी झालेला ९ लाखांचा इतर खर्चही वाया गेला. त्यामुळे एकूण १९ लाख ८२ हजार ५०० रुपयांचे नुकसान झाल्याचे फिर्यादीत नमूद करण्यात आले आहे. या प्रकरणी ‘माईल्सस्टोन हॉलिडेज’ कंपनीचे संचालक तेजस शशिकांत वैष्णव, मधुमती शशिकांत वैष्णव आणि शशिकांत वैष्णव (सर्व रा. शक्तिमान टॉवर, बस स्थानकाजवळ, संगमनेर) यांच्यावर गुन्हा दाखल करण्यात आला आहे.
नाशिक पोलिसांचे एक पथक या प्रकरणाच्या पुढील तपासासाठी लवकरच संगमनेरला येणार असल्याचे समजते. या घटनेमुळे ट्रॅव्हल एजंटची निवड करताना प्रवाशांनी योग्य ती खबरदारी घेणे आवश्यक असल्याचे पुन्हा एकदा अधोरेखित झाले आहे.
