महाराष्ट्र संवाद न्यूज –
प्रसूतीसाठी ग्रामीण रुग्णालयात दाखल झालेल्या एका महिलेची सोनोग्राफी करताना, तिच्या पोटाला जेलीऐवजी चक्क ॲसिड लावण्यात आले. या गंभीर चुकीमुळे महिला भाजली असून तिच्यावर उपचार सुरू आहेत. सुदैवाने, या घटनेनंतर अर्ध्या तासाने महिलेने एका गोंडस आणि सुखरूप बाळाला जन्म दिला आहे.
मिळालेल्या माहितीनुसार, या महिलेला प्रसूतीसाठी भोकरदन ग्रामीण रुग्णालयात दाखल करण्यात आले होते. सोनोग्राफीसाठी तिच्या पोटावर जेली लावण्याऐवजी, एका नर्सने चुकून ॲसिड लावले. यामुळे महिलेच्या पोटाला आणि काही अवघड जागांना गंभीर इजा झाली आहे.
रुग्णालय प्रशासनाने दिलेल्या माहितीनुसार, सोनोग्राफी रूममधील औषधांच्या ट्रेमध्ये एका ब्रदरने सोल्युशनऐवजी ॲसिड ठेवले होते, ज्यामुळे ही चूक झाली. या घटनेनंतर, महिला वेदनेने ओरडू लागल्यावर तिच्या नातेवाईकांनी नर्सला याबाबत विचारणा केली. मात्र, नर्सने त्यांच्यावरच आरडाओरड करून रुग्णालयातून दोन तास काढता पाय घेतला, असा गंभीर आरोप नातेवाईकांनी केला आहे.
या घटनेमुळे भोकरदन ग्रामीण रुग्णालयातील प्रशासनाचा निष्काळजीपणा आणि भोंगळ कारभार पुन्हा एकदा चव्हाट्यावर आला आहे. गंभीर भाजलेल्या महिलेवर सध्या त्याच रुग्णालयात उपचार सुरू आहेत. या प्रकरणाची सखोल चौकशी करून दोषींवर कठोर कारवाई करण्याची मागणी नागरिकांकडून होत आहे.
