महाराष्ट्र संवाद न्यूज –
लाचलुचपत प्रतिबंधक विभागाने (ACB) मोठी कारवाई करत न्यायालयाच्या दोन लिपिकांना 35 हजार रुपयांची लाच घेताना रंगेहाथ पकडले आहे. भाडेकरूकडून सदनिकेचा ताबा मिळवून देण्यासाठी या लिपिकांनी सदनिका मालकाकडून लाचेची मागणी केली होती.
या प्रकरणी न्यायालयाचे लिपिक रवींद्र हिंदुराव पवार (40) आणि अमित बबन भुसारी (34) यांच्याविरोधात भ्रष्टाचार प्रतिबंधक अधिनियमांतर्गत गुन्हा दाखल करण्यात आला आहे. हे दोघेही भाडे नियंत्रण कायदा न्यायालयात कार्यरत आहेत.
सिंहगड रोड येथील हिंगणे खुर्द येथील विशाल पार्क सोसायटीत तक्रारदारांची सदनिका आहे, ती त्यांनी भाड्याने दिली होती. भाडेकरू सदनिका सोडण्यास तयार नसल्याने तक्रारदारांनी भाडे नियंत्रण कायदा न्यायालयात खटला दाखल केला होता. न्यायालयाने तक्रारदारांच्या बाजूने निकाल देत भाडेकरूला तात्काळ ताबा सोडण्याचे आदेश दिले होते.
न्यायालयाच्या या आदेशाची अंमलबजावणी करून सदनिकेचा ताबा तक्रारदाराला मिळवून देण्यासाठी लिपिक रवींद्र पवार आणि अमित भुसारी यांची नेमणूक करण्यात आली होती. त्यांनी या कामासाठी तक्रारदाराकडे 40 हजार रुपयांच्या लाचेची मागणी केली.
या लाच मागणीनंतर तक्रारदाराने 21 जून रोजी लाचलुचपत प्रतिबंधक विभागाकडे तक्रार दिली. एसीबीच्या मध्यस्थीनंतर 35 हजार रुपये लाच देण्याचे ठरले. शुक्रवारी, (27 जून) पवार आणि भुसारी यांनी न्यायालयाच्या आदेशानुसार तक्रारदाराला सदनिकेचा ताबा मिळवून दिला.
ही प्रक्रिया पूर्ण झाल्यावर पवार आणि भुसारी यांनी तक्रारदाराला सिंहगड रस्त्यावरील एका हॉटेलमध्ये बोलावले. एसीबीने हॉटेल परिसरात सापळा रचला होता. तक्रारदाराकडून 35 हजार रुपयांची लाच घेताना पवार आणि भुसारी यांना एसीबीने रंगेहाथ पकडले. या दोघांविरोधात सिंहगड रोड पोलिस ठाण्यात गुन्हा दाखल करण्यात आला असून, पोलिस निरीक्षक प्रसाद लोणारे या प्रकरणाचा पुढील तपास करत आहेत.
