संगमनेर, प्रतिनिधी:
संगमनेर तालुक्यातील आनंदवाडीजवळ आज सकाळी (शुक्रवार, ४ जुलै) शालेय विद्यार्थ्यांची स्कूल बस पलटी होऊन चार विद्यार्थी जखमी झाले. घटनेची माहिती मिळताच आमदार अमोल खताळ यांच्या पत्नी, नीलम खताळ यांनी डॉ. गुंजाळ हॉस्पिटलमध्ये जाऊन जखमी विद्यार्थ्यांची भेट घेतली आणि त्यांना धीर दिला.
साकूर पठार भागातील अनेक विद्यार्थी चंदनापुरी येथील चंदनेश्वर विद्यालयात शिक्षणासाठी दररोज स्कूल बसने येतात. आज सकाळी ९ वाजण्याच्या सुमारास, चंदनेश्वर विद्यालयाची बस (क्र. MH 14 BA 8932) ३५ विद्यार्थ्यांना घेऊन चंदनापुरी घाटातून आनंदवाडीमार्गे विद्यालयाकडे जात होती. आनंदवाडी शिवारातील एका वळणावर एका वाहनचालकाने ओव्हरटेक करण्याच्या प्रयत्नात बसचालकाला हुलकावणी दिली. बसचालकाने प्रसंगावधान राखून बस बाजूला घेतली असता, ती साईड गटारात पलटी झाली. या अपघातात तीन ते चार विद्यार्थी किरकोळ जखमी झाले.
अपघाताची माहिती मिळताच आमदार अमोल खताळ यांच्या पत्नी नीलम खताळ, शिवसेनेचे तालुका प्रमुख रामभाऊ राहाणे, ग्रामपंचायत सदस्य अंकुश राहाणे, गुंजाळवाडी पठारचे किरण भागवत, किसन सरोदे, जनता प्रसारक मंडळाचे अध्यक्ष आनंदराव कढणे, सेक्रेटरी अनिल कढणे, रामदास परबत, तसेच विद्यालयाचे प्राचार्य अशोक खेमनर यांनी तात्काळ चंदनापुरी घाटातील डॉ. आर. एस. गुंजाळ हॉस्पिटलमध्ये जाऊन जखमी विद्यार्थ्यांची विचारपूस केली आणि त्यांना धीर दिला.
