महाराष्ट्र संवाद न्यूज ऑनलाईन वृत्त
मुंबई, १७ जुलै:
मुख्यमंत्री देवेंद्र फडणवीस यांनी आज शिर्डी आणि पुरंदर विमानतळांच्या कामांचा आढावा घेतला. आगामी नाशिक-त्र्यंबकेश्वर कुंभमेळ्यापूर्वी शिर्डी विमानतळावरील प्रस्तावित कामे पूर्ण करण्याचे निर्देश त्यांनी यावेळी दिले. शिर्डी विमानतळाचे नूतनीकरण आणि विस्तारीकरण लवकरात लवकर पूर्ण होणे आवश्यक असल्याचे मुख्यमंत्री म्हणाले.
विधानभवनात झालेल्या या बैठकीला उपमुख्यमंत्री अजित पवार, जलसंपदा मंत्री राधाकृष्ण विखे पाटील यांच्यासह संबंधित विभागांचे अधिकारी उपस्थित होते.
मुख्यमंत्री फडणवीस यांनी सांगितले की, शिर्डी विमानतळावर नवीन एटीसी इमारत, नवीन एकात्मिक मालवाहतूक इमारत आणि नवीन टर्मिनल इमारतीची कामे प्रस्तावित आहेत. ही कामे सध्या संथगतीने सुरू असून, ती कुंभमेळ्यापूर्वी पूर्ण होणे गरजेचे आहे. यासाठी आवश्यकतेनुसार अतिरिक्त मनुष्यबळ वापरण्याचे आणि खरेदी व स्ट्रक्चरल डिझाइनची कामे एका आठवड्यात पूर्ण करण्याचे निर्देश त्यांनी दिले. मुंबई आणि नवी मुंबई विमानतळाजवळ असल्याने लहान विमानांच्या पार्किंगसाठी शिर्डी विमानतळाचा वापर होऊ शकतो. यासाठी आवश्यकतेनुसार आणखी जमीन संपादन करण्याचे निर्देशही मुख्यमंत्र्यांनी दिले.
पुरंदर विमानतळासाठी सर्वेक्षण पूर्ण झाले असून, आता भूसंपादन प्रक्रिया तातडीने सुरू करण्याचे निर्देश पुणे जिल्हाधिकाऱ्यांना देण्यात आले. हे विमानतळ सुरू झाल्यावर महाराष्ट्रातील विमानसेवा मोठ्या प्रमाणात वाढेल, असे मुख्यमंत्री म्हणाले. उपमुख्यमंत्री अजित पवार यांनीही पुरंदर विमानतळाचे काम लवकर सुरू व्हावे अशी सूचना केली. तसेच, या विमानतळावर मोठ्या विमानांच्या लँडिंगची आणि हँगरची व्यवस्था असावी असे त्यांनी सांगितले.
महाराष्ट्र विमानतळ विकास प्राधिकरणाच्या उपाध्यक्ष स्वाती पांडे यांनी यावेळी दोन्ही विमानतळांच्या कामांची सविस्तर माहिती सादरीकरणाद्वारे दिली.
Post Views: 611
